Meriko nga nanglugos og dalagita tiklo
CEBU, Philippines - Gidakop sa kapolisan ang usa ka albularyo kinsa dugay na nga wanted sa kasong pagpanglugos didto sa barangay Looc lungsod sa Oslob niadtong Lunes sa gabii.
Ang mikagulkol na karon sa prisohan mao si Eliseo Omaya Emia, 56, minyo, nagpuyo sa maong lugar ug usa ka manambalay og Binisaya sa maong lugar.
Ang biktima nga giingong gilugos sa suspetsado mao ang usa ka 16 anyos nga dalagita nga iyang silingan ug iya ra usab nga pasyente niadtong tuig 2009.
Si PO3 Nelson Saquibal sa Oslob Police Station mibutyag sa Banat News nga ang suspetsado niadto lang miaging Lunes nila hidakpi tungod kay milayas kini human malutsi og arrest warrant bahin sa iyang kaso.
Si Oslob Regional Trial Court (RTC) Branch 62 Judge James Steward Himalaloan maoy nagpirma sa arrest warrant batok ni Emia.
Matud ni PO3 Saquibal nga nakadawat sila og inpormasyon nga ang suspek miuli na sa ilang balay hinungdan nga dali nila kining gisikop.
Ang suspek wala hinuon mosukol dihang gi-aresto ug gidala ngadto sa buhatan sa kapolisan dayon gibalhug sa prisohan.
Dugang pa ni PO3 Saquibal nga human mapasakai og kaso ang suspek nagtago- tago na kini ug kawat-kawat na lang sa pagpanambal niini sa iyang mga pasyente. (WC) (BANAT NEWS)
- Latest
