Karambola sa sakyanan sa Toledo 13 naangol

CEBU, Philippines - Trese ka mga tawo ang samdan sa panagbangga sa tulo ka mga sakyanan kagahapon sa buntag sa national highway sa Sitio Kabulihan, Barangay Magdugo, siyudad sa Toledo.

Kasagaran sa mga naangol pasahero sa GT Express v-hire (GWW-474) nga gimaneho ni Pepito Pantallano, taga-Barangay Awihao. Si Pantallano gihulagway nga kritikal tungod sa nahiaguman niining samad sa kalawasan.

Laing samdan sila si Willy Salado, 21, ug Vivian Yap, 50, pulos taga-Barangay Bato; Elvira Alipin, 27, taga-Barangay Magdugo; Abondio Alipin Jr., 31, taga-Barangay Matab-ang; Ivy Cristine Parahinog, 19, ug Jophil Birbo, 34, taga-Barangay Magsaysay; Gasuya Togo, 3, ug Akira Togo, 66, taga-Barangay Poblacion; Marcelino Adlawan, 35, taga-Barangay Daanglungsod; Francis Dimali, 29, taga-Barangay Subayon; ug Ronilyn Maasin, 17, taga-Barangay Cambang-ug.

Ang mga biktima gidala sa Don Vicente Sotto Memorial Medical Center sa siyudad sa Sugbo. Samtang naangol usab ang pasahero sa tricycle, Jhenierose Barangan, 13.

Natanggong na sa karsel sa Oslob Police Station si Raymundo Luaña, 47, taga-Barangay Valladolid, Carcar City, ug drayber sa Mitsubishi L200 pick-up (GSM-726).

Matud ni PO2 Celso Makidato, traffic investigator, nga ang v-hire paingon sa dakbayan sa Toledo samtang ang pick-up paingon usab sa siyudad sa Sugbo dihang nahitabo ang maong panagbangga.

Tungod sa kakusog sa impact, naigo sa v-hire ang tricycle nga gimaneho ni Isidro Ingaling, 43, taga-Barangay Magdugo. (EIM)(BANAT NEWS)