Nobenaryo sa Pista Senyor sugdan ugma

CEBU, Philippines - Ipahigayon ugma sa kaadlawon ang “Walk with Jesus” nga sugdan diha sa Fuente Osmeña Rotunda padulong sa Basilica Minore del Sto. Niño, kini mao ang opisyal nga pagbukas sa siyam ka adlaw nga nobenaryo alang sa kapistahan sa Senyor Sto. Niño.

Ang mga debotos anha magtapok sa Fuente Osmeña Rotunda alas-4 sa buntag ug magsugod ang penitential procession alas-4:30 padulong sa basilica.

Alas-5 sa kaadlawon himuon ang Santos nga Misa nga i-selebrar sa rector sa basilica nga si Rev. Fr. Jonas Mejares ug human niini ipaila ang Hermana ug Hermano Mayores.

Samtang karong Enero 19 himuon ang solemn procession alang sa Milagrosong Bata – Señor Sto. Niño diin gipaabot nga moabot sa kapin usa ka milyon nga mga debotos ang manguyog. 

Matag-usa kanila magdala og mga kandila ug rosaryohan diin mosabat sila sa pag-ampo sa Holy Rosary sa nagkadaiyang mga pinulungan.

 Ang rota sa solemn procession magsugod sa Basilica Minore del Sto. Niño padulong sa Fuente Osmeña Rotunda ug moliko kini patuo sa Gen. Maxilom Avenue padung sa Lorega St., ngadto sa M.J. Cuenco Avenue hangtud sa Plaza Independencia ug balik ngadto sa Basilica del Sto. Niño.

Isunod dayon ang pontifical mass sa alas 6:00 sa gabii nga panguluhan ni Palo Archbishop John Du sa Palo, Leyte.

Human niini, mosayaw og Sinulog ang mga deboto kay gituohan nga matubag ang ilang mga pag-ampo pinaagi niini, isunod dayon ang grand fireworks display.

Sa dili pa ang solemn procession, adunay fluvial procession sa susama gihapon nga adlaw, nga sugdan sa alas 7:00 sa buntag, ang rota niini magsugod sa Ouano Wharf, padulong sa Mactan Bridge, ngadto sa Lapu-Lapu, dayon sa Pasil ngadto sa Pier 1.

Alas 9:30 sa buntag, adunay re-enactment sa pag-abot sa imahe nga sundan sa re-enactment sa Unang Misa ug Bunyag.

Atol sa Sinulog fluvial parade, ang mga turista, OFWs, debotos ug mga Sugbuanon ang magsakay sa mga nagkadaiyang mga sakyanang pangdagat. (EIM) (BANAT NEWS)