Cortes may purohang piliong gobernador?

CEBU, Philippines - Nangangkon si Independent Gobernatorial Candidate Boyet Cortes nga siya maoy nakabentaha karon niining nagpadayong kaguliyang sa Kapitolyo tungod kay dismayado  na ang mga Sugboanon sa maong panghitabo.

Matud ni  Cortes   nga grabi kasagmuyo ang gihambin karon sa mga Sugboanon niining maong panghitabo  sa Kapitolyo subay sa  iyang   mga nahimamat sa iyang pagsuroy- suroy sa siyudad sa Talisay, Mandaue, lungsod sa Argao ug Balamban   sa  milabay  nga  mga adlaw. Alang kang Cortes resulta na kini sa bati nga pamolitika tali sa kampo ni suspendidong governor Gwendolyn Garcia kinsa  alang kaniya nahangol sa gahum ug dili motuman  sa balaod.

Samtang sa habig  usab ni acting Governor Agnes Magpale gihulagway   usab  ni  Cortes  nga walay political will tungod kay dili makamaong mopatuman  sa hustong  lagda  sa balaod.

Alang kang Cortes anaa na karon kang Acting Governor Magpale ang pagdesisyon kun manduan niini ang kapolisan aron pugson pagpapahawa ang suspendidong gobernador nga padayung nagmagahi   sa pagbiya  sa Kapitolyo.

Matud ni Cortes dili maayong panag- ingnan ang nahitabo karon sa Sugbo nga giilang labing malambuon ug daku nga probinsiya   nga gumikan  niini ,  sa pagkakaron nahimo  na   hinoong  duha ang naglingkod nga gobernador.

Si Cortes mitataw nga usa sa hinungdan nga wala siya mopasilong og partido niining iyang pagpapili pagka gobernador sa eleksyon karong Mayo tungod kay dili siya gusto nga magawongan og partido nga moresulta unya sa dili na pagkab-ot sa iyang personal nga mga desisyon ug baruganan.

Nagkanayon si Cortes nga kun magdugay pa ang maong   kagubot  sa Kapitolyo  mas makaayo kini sa iyang kandidatora tungod kay mosamot ang pagpangluod sa mga Sugboanon ngadto sa maong mga politiko  busa  dako  og  purohan  nga   siya  nay  pilion  niini. Ang igsoon ni suspendidong  governor Garcia nga si Kongresista Pablo John Garcia sa One Cebu maoy ika-atbang ni Cortes   ug  ni  Atty. Hilario Junjun Davide III sa Liberal Party (LP) ni Presidente Benigno Aquino III. (Darrel A. Carumba) (BANAT NEWS)