Ligid di padauban sa karsada

CEBU, Philippines - Gimando   sa  Department of Public Works & Highways (DPWH) ang  pagdili  sa  pagsunog sa mga ligid sa mga kadalanan.

Ang  maong  kamandoan  giluwatan  ni kalihim Rogelio L. Singson  sa DPWH  human  mapanid-i  niini nga sa nangaging tuig  may  mga tawo  nga  magdaob  og  mga  ligid  sa mga karsada.

Matud pa ni Singson nga kung pagsunog  og  unsa mang  mga butang  sa semento  nga  karsada  o kaha aspalto  dali kining  makapagabok  sa  mga  material  sa karsada nga  mosangpot  sa  hinanali  nga  pagkagusbat  niini.

Miingon  siya  nga  kun  maguba  ang  karsada hasol  na kaayo  alang  sa  mga  motorista  ang  pag-agi  niini ug labaw  sa tanan  ang  polusyon  sa aso  nga mugna  sa guma  sa sakyanan  nga daoban  puwerting  makadaot  sa lawas  sa tawo.

“Ang aso nga nagagikan sa gisunog nga ligid  makahilo busa makadaot sa tawo ilabi na sa mga bata,” kini ang pamahayag ni Singson.  Gimandoan usab niya ang  Philippine National Police (PNP) ug kagamhanang lokal nga ipa-estrikto ang pagpatuman sa pagdili sa pagsunog o sa pagdaob ug mga ligid sa karsada.

Sa samang higayon gimando usab ni  Singson sa tanang hepe sa DPWH ug mga  enhinyero sa distrito nga makig-alayon sa mga lokal nga opisyales ug pwersa sa kapolisan aron ika-implementar ang higpit nga  pagdili sa pagsunog sa mga ligid  sa kadalanan. (BANAT NEWS)