CEBU, Philippines - Patay na nga natagak sa gimaneho niining motorsiklo ang usa ka 43-anyos nga lalaki human kini gi-overtekan sa duha ka mga lalaking nagmotorsiklo ug mipusil kaniya makadaghang higayun samtang nagsubay sa Rizal St., sa barangay Poblacion sa siyudad sa Danao niadtong Sabado sa alas 10:30 sa gabii.
Ang biktima mao si Mamerto Laurel, way klarung trabaho, nagpuyo sa Sitio Ylaya, Danao.
Matud ni PO2 Fiel Resauro sa Danao City Police Station dihang nahinabi sa Banat News paingon na untang mopauli ang dihang kalit gituparan sa mga mamumuno nga nagsunod kaniya ug pag-abot sa nahitaboan gipaulanan kini og bala.
Ang biktima diretso og katagak sa iyang motor samtang misutoy palayo ang mga gikatahapan.
Gisuwayan pa unta og hatud ang biktima sa Danao City District Hospital apan gideklarar kini nga dead on arrival.
Subay sa inisyal nga imbistigasyon sa kapulisan ang biktima makaduha na ka higayun nga gipusil kanidto apan wala maantimano.
Nakadawat og report ang kapulisan nga dunay mga kontra ang biktima sa lugar niini apan sagad ini wala lang mosang-at og kaso.
Personal nga kasungian ang motibong gitutukan karun sa nagpadayung imbistigasyun sa kapulisan aron matumbok si kinsa ang mga kriminal. (BANAT NEWS)