CEBU, Philippines - Patay na nga napalgan ang usa ka konduktor kansang dughan may samad dinunggaban didto sa karsada sa barangay Pit-os, dakbayan sa Sugbo kagahapon sa alas 6:00 sa buntag. Ang biktima nailhan nga si Roy Villagracia, hingkod, nga taga barangay Barrio Luz ug giingong usa ka konduktor sa PUJ nga may rota nga 62C.
Sa pasiunang imbestigasyon sa kapolisan nasayran, nga ang biktima samdan sa tuong bahin sa dughan nga nagbuy-od daplin sa karsada nga patay na.
Sa pakisusi sa kapolisan sa lugar diin mapalgi ang patay’ng lawas sa biktima, ilang napunitan ang usa ka kutsilyo nga gituohang maoy gigamit sa pagluba sa biktima.
Nasayran usab sa kapolisan nga sa wala pa namatay ang biktima katapusan kining nakit-an sa miaging adlaw nga nakig-away sa usa ka drayber nga nailhan sa ngalang Eddie sa sakyanang iyang gikonduktoran.
Nasuko kuno si Eddie tungod kay P500 ra ang ilang kita sa pamasahero sa tibuok adlaw. Matud pa ni SPO1 Ruth Violanggo sa Homicide Section sa Cebu City Police Office nga ila pang gisuta kun kinsay nagpatay sa biktima.
Dugang pa ni Violanggo nga ilakip nila sa pag-imbestigar ang drayber nga gikaaway sa biktima. (BANAT NEWS)