Patay nga naputos sa dinunggaban nailhan na

CEBU, Philippines - Ang  usa  ka lalaki  kansang lawas  naputos sa samad dinunggaban  ug napalgang patay didto  sa sitio Ranger  barangay Pooc, dakbayan sa Talisay niadtong  Miyerkules sa  gabii, nailhan na niadtong Biyernes.

Ang  biktima mao si Jesrel Resurection, 20, taga barangay Tubod, lungsod sa Minglanilla ug usa ka drayber sa habal-habal.

Si PO2 Roy Lofranco, duty desk officer  sa kapolisan  sa  maong  dakbayan   mibutyag sa Banat News kagahapon nga ang iyaan ni Resurection nga si Diana Marquez, 58,   maoy  mi-report  ngadto  sa ilang  buhatan niadtong Biyernes  bahin sa iyang pag-umangkon nga namasada  sa  habal-habal niini  ug wala na mouli.

Giingong si Resurection mibiya  sa ilang balay  sakay  sa iyang habal-habal   aron mamasahero   niadtong Miyerkules sa alas 6:00 sa gabii.

Unya  sa pagka-alas 10:00  pasado sa gabii, napalgan ang   iyang patay’ng lawas didto  sa mingaw kaayong lugar sa sitio Ranger nga nabulit sa samad dinunggaban, apan  wala’y nakaila niini.

Gituohan  sa kapolisan  nga    ang biktima misukol  sa mamumuno hinungdan  nga  gipatay  kini.

Matud ni  Lofranco nga human  mosugilon  kanila   si Marquez , gisugo  nila  kini  nga ipasusi  sa Saint Francis Funeral Homes sa barangay Bulacao, Talisay   diin  balsamaha  ang    patay’ng  lawas   sa  biktima  ug  didto  positibo  kining giila  sa iyaan.

Gituohan sa mga polis nga nasakyan og tulisan ang biktima ug pag-abot sa lugar nga nahitaboan gitulis kini ug ang motorsiklo niining gimaneho nga Honda wave nga kolor puwa nga nagtangag sa plakang OD-5065 gidala usab sa tulisan. (/WC)(BANAT NEWS)