CEBU, Philippines - Nunot ning nagsingabot nga eleksiyon karung bulan sa Mayo, ang Commission on Elections gikatakdang mopahigayon og election summit inabagan sa Department of Education ug Simbahang Katoliko sa Sugbo karung petsa 23 sa bulan sa Pebrero.
Matud ni Comelec Provincial Supervisor Atty. Lionel Marco Castillano dihang nahinabi sa Banat News sentro sa pagahimoong summit mao ang pagtuki sa tanang posibleng masinati nga problema sa pagpahigayon unya sa eleksyon. Apil na niini ang pagpahigayon og information drives sama sa voters education campaign batok sa vote buying panahon sa eleksyon aron ma-edukar ang mga botante nga dili magpalingla sa pinalitay og botos ug mobotar pinasubay sa ilang konsensya.
Matud ni Castillano gikasabutan nila ang pagpahigayun og summit human sa ilang tigum tali sa simbahan sa milabay’ng semana nga gitambongan ni Msgr. Romel Kintanar isip representante ni Cebu Archbishop Jose Palma.
Atol unya sa election summit matud pa ni Castillano apil sa ilang tuki-on ang kabahin sa subling paggamit sa Precinct Count Optical Scan (PCOS) machines sa eleksyon karung tuiga.
Ang simbahan usa sa mga misaway sa maong mga makina kay giingong malutsan gihapon kini sa pagpanikas sama sa nahitabo sa nilabay’ng 2010 election.
Apan gipasabot ni Castillano nga lima ka adlaw sa dili pa ang eleksyon dunay himuong mock elections gamit ang maong mga makina aron masigurong dili kini depektoso.
Gidapit sa Comelec ang lain-laing sector sa pagtambong sa election summit karung sunod bulan ug ipahibalo pa unya kung asa kini himuon. (BANAT NEWS)