Lalaki gipusil angol sa nag-motor

CEBU, Philippines -  Kritikal ang kondisyon sa usa ka 21-anyos nga lalaki human kini pusila sa duha ka wala hiilhing mga kriminal didto  sa sitio  Laray, duol  sa gasoline  station ,barangay  San Roque, dakbayan  sa Talisay niadtong Biyernes sa gabii

Ang biktima  mao  si Reymond Labaya Dechosa, 24,  residente sa nahisgutang dapit.

Nakaangkon kini og samad pinusilan sa walang bahin sa ulo, tuong abaga ug walang paa   ug  gidala ngadto sa Vicente Sotto Memorial Medical Center  ubos  sa talandugong  kahimtang.

Nakapunit  ang  kapolisan  og  upat ka kabhang  sa mga bala sa kalibre .45 nga pistola  sa dapit  nga  nahitaboan.

Sa imbestigasyon nila ni SPO4 Daniel Tarucan ug PO3 Ferdinand Pablo   nasuta  nga sa wala pa  pusila si Dechosa  nagbarog  kini  duol  sa usa  ka  poste  sa  maong  lugar  uban  sa iyang  mga  higala dihang  may duha  ka  wala hiilhing  lalaki   nga nagsakay og kolor puwa nga motorsiklo   kalit nga  mihunong  sa ilang  atubangan ug ang angkas niini   nga nagbitbit og pistola   maoy   miatubang   sa  biktima.

Si Dechosa kinsa  nakamatikod  nga  pusilon  siya mikaratel  og dagan paingon ngadto sa sudlonong bahin  duol sa gasoline station apan gisunod kini sa kriminal ug gipusil sa  makadaghan  hangtud nga nahagba   kini sa yuta .

Sa pagtuo  nga  patay  na  ang  biktima,  namiya  lang  usab  dayon  ang  mga  kriminal  sakay  sa ilang  motorsiklo  paingon ngadto sa Cebu South Coastal Road.

Si Pablo nga nahinabi sa Banat News kagahapon nagkanayon nga ang biktima   maoy tigbantay  sa bilyaran  sa ilang lugar ug usahay  mo –sideline  kini   pagkadispatser og   PUJ.

Matud ni Pablo nga ang biktima komediyante kaayo  ug gituohang   ang  mipusil  kaniya  nasuko  sa iyang  komedya. Ang kapolisan nagpahigayon  na  og follow-up nga imbestigasyon sa maong hitabo. (BANAT NEWS)