CEBU, Philippines - Naukay kagahapon si suspendidong Gob. Gwendolyn Garcia uban sa iyang mga kabanay ug supporters sa presensya sa mga sakop sa Special Weapons and Tactics (SWAT) palibot sa Kapitolyo.
Nadawat nga taho sa kampo ni Garcia mao nga misulod ang mga sakop sa SWAT sa Kapitolyo alas-9 sa buntag samtang nasigpatan usab si Kong. Tomas Osmeña, kaaway ni Garcia sa gawas nga bahin niini.
Nitumaw ang pagduda nga si Osmeña ug iyang mga kaalyado nga si acting Gob. Agnes Magpale ang mihatag sa kamandoan apan daling gihimakak sa duha ka opisyal.
Kagahapon ang magsuong anak ni Garcia nga sila si Atty. Ma. Esperanza Christina Garcia-Frasco ug Paulo Garcia mipahibawo sa ilang Twitter nga armado ang mga sakop sa SWAT ug andam na mobitbit sa gobernador paggawas sa iyang buhatan subay sa sugo ni DILG Secretary Mar Roxas.
Apan ang tinubdan sa DILG sa kaulohan nagkanayon nga walay kamandoan si Roxas ug gawas pa, atoa kini sa gawas sa nasud.
Ang anak ni Magpale nga si Bokal Miguel Antonio Magpale nipahibawo usab nga mismo ang iyang inahan ang misusi sa maong taho apan dili kini tinuod.
Matud pa ni Garcia nga nanawag kaniya si Cebu City Mayor Michael Rama ug nakisayud kung mga sakop ba sa SWAT sa syudad ang miadto sa Kapitolyo apan ilang nasuta nga gikan sa dakbayan sa Lapu-lapu.
Apan gihimakak usab kini sa SWAT sa dakbayan sa Lapu-lapu sanglit wala kini sa ilang blotter. Nagtoo si Garcia nga ang presensiya sa mga sakop sa SWAT sa Kapitolyo pagpanghadlok lang kini ngadto sa iyang mga supporters nga buot mobisita kaniya.
“If they would really forcibly remove me, this is going to be a spectacle that the Filipinos will not accept,†matud pang Garcia. (BANAT NEWS)