Masiao coordinator ug mga ushers nadakpan

CEBU, Philippines - Panimalay sa giilang coordinator sa masiao sa barangay Villagonzalo dakbayan sa Sugbo gironda, suspek ug mga sakop nangadakpan sa aktong nagkwenta sa ilang kinitaan.

Ang nadakpang gitumbok nga coordinator mao si Steve Tan, ug giapil sa gipangdakop ang walo ka tawo nga sila si Anabella Aparicio, Fe Teves, Ramon Hermosa, Ramon Javier, ug Ligaya Palabo ug laing tulo ka menor de edad.

Nakuha sa maong operasyon mao ang mga paraphernalia sa sugal nga masiao, kwarta nga nagkantidad og kapin kon kulang P10 mil nga gituohang halin.

Sa pakighinabi sa Banat News kang Chief  Insp. Romeo Santander, misaysay kini nga  adunay asset nila nga mipusta sa mga suspek ug dihang nakompirmar nga kini nalambigit sa maong ilegal nga sugal gidakop kini. Matud pa ni Santander nga ang walo ka tawo lakip sa tulo ka menor de edad nga ilang gisikop diha sa maong lugar ug gihulagway nga mga ushers kini sa coordinator.

Butyag pa ni Santander nga ang ilang nasikop nga coordinator mokita sa usa ka adlaw og labing minos usa ka gatos mil pesos.

Gihulagway usab ni Santander nga anaa sa ilang watchlist si Tan nga dugay na nilang gipanid-an.

“Ang information nga nakuha namu, is they are moving from one place to another,” matud pa ni Santander.

Samtang ang usa sa menor de edad nga naapil og kasikop giingong miadto didto sa lugar aron mopusta. Samtang si Aparicio miklaro nga igo ra siyang namusta sa pamasin nga makadaog. Ang coordinator nga gikuhaan sa iyang bahin sa Banat News, nagdumili kini sa paghatag og komento. Matud pa ni Santander nga gawas kang Tan pasakaan gyud og kaso subay sa balaod sa illegal gambling ang walo nga nasikop. (BANAT NEWS)