Barko naanod gumikan sa dagkong bawod

CEBU, Philippines - Malinawong gipadunggo  sa pantalan  sa dakbayan  sa  Dumaguete  ang M/V Zamboanga Ferry  human  kini  guyora  og tugboat gikan  sa iyang  pagkaanod  sa kadagatan  sa maong dakbayan.

Kini  human  ikataho  nga nabugto  ang  pisi nga gigaid niini  sa pantalan  sa Dumaguete  gumikan sa dagkong  bawod  busa  gianod  kini  ngadto  sa lawod.

Ang tagdumala  sa George and Peter Lines  nga  maoy  tag-iya  sa maong  barko  dali kaayo  nga  mihimakak  sa pasangil  nga  napalyar  ang  makina  sa maong  sakyanan.

Hinuon  kagahapon sa alas 9:00 sa buntag midunggo sa Pier 2     sa dakbayan sa Sugbo ang  228  ka  pasahero  sa maong   barko  nga  gihakot  sa  M/V Georich  ang igsoong  barko  sa M/V Zamboanga Ferry.

Nasayran  usab  nga  usa  sa  mga  pasahero  nga giingong  taga  dakbayan  sa Lapulapu  ug  usa  ka  masakiton kansang  ngalan  wala  ibutyag  giingong  nakabsan  sa kinabuhi  sulod sa maong  barkong naanod.

Sa GMA Balitang  Bisdak kagahapon  nasayran  nga susihon  pa  sa mga otoridad sa panakyanan  sa kadagatan  kun  angay  pa bang  pabiyahion  sa kadagatan  ang  maong  barko. (Brenda D. Batuto/WC) (BANAT NEWS)