34 lugar ug 10 PAGs bantayan kaayo atol sa 2013 elections

CEBU, Philippines - Gipahibalo sa Regional Intelligence Branch nga dunay 34 election watchlist areas ug napulo ka private armed groups sa Central Visayas nga ilaha karong gitutukan nunot niining nagsingabot nga 2013 elections.

Ang watchlist areas ug mga private armed groups mitumaw human sa gihimong evaluation sa Armed Forces of the Philippines ug sa Philippine National Police.

Nasuta na nga sa 34 ka dapit, 14 niini nia sa lalawigan sa Sugbo nga naglakip sa Sogod, Barili, San Fernando, Daanbantayan, Tuburan, Sta. Fe, Ronda, Pinamungajan, Tabogon ug Dumanjug.

Nalakip usab sa listahan ang  mga siyudad sa Bogo, Danao, Carcar ug Lapu-Lapu.Apil usab sa listahan ang Tagbilaran City, Trinidad ug Carmen sa Bohol.  Sa Negros Oriental, ang mga siyudad sa Bayawan, Guihulngan, Canlaon ug  Tanjay ingon man ang kalungsoran sa Jimalalud,  Bacong,  La Libertad, Zamboanguita, Vallehermoso, Bindoy, Pamplona, Sibulan, Valencia, Siaton, ug Sta. Catalina nalakip usab sa watchlist.

Samtang sa Siquijor, bugtong ang lungsod lang sa Larena maoy naapil sa listahan sa mga posibleng adunay kagubot nga mahitabo.

Matud pa ni Supt. Pablo Labra II, hepe sa RID, ang maong mga lugar ang naapil sa listahan sa watchlist dunay mga election related violence sa nakalabay nga 2010 elections.

Gawas pa sa election related violence, matud ni Labra pipila sa mga dapit ilabi na sa Negros Oriental ang adunay aktibong kalihokan sa mga komunista.

Giila usab sa Regional Intelligence Coordinating Center Workshop ang napulo ka mga private armed groups (PAGs) sa Central Visayas, tulo niini dinhi sa Sugbo nag-operate.

Giila sa kapolisan ang grupong naglihok dinhi sa Sugbo mao ang Sumabong-Ancero Group, Omboy-Sanopao Group ug Sigue Group.

Samtang sa Bohol mao ang Reyes Group ug  Galve Group. Sa Negros Oriental mao ang Tanasan-Libron Group, Dumag-ug Group, ug Desperado Group,  Fuentevilla-Lozano Group ra usab ang natala gikan sa Siquijor  ug ang gitawag nga Sidlak Group sa siyudad sa Lapu-Lapu.

“Some of these groups are inactive but some will be activated during election time,” matud pang Labra. (Ria Mae Booc/EIM) (BANAT NEWS)