Gwen mosayaw sa Sinulog
CEBU, Philippines - Nagtinguha gihapon si Gob. Gwendolyn Garcia nga mosayaw atol sa Sinulog Festival karong tuiga taliwala sa iyang pagka-suspenso. Apan ang tinguha ni Garcia mag-agad sa desisyon sa Court of Appeals sa iyang gipangayong temporary restraining order nga gikatakdang husayon karong Enero 10 samtang ang Sinulog unya nang Enero 20.
Ikasiyam na unta nga tuig ni Garcia sa iyang pagsayaw matag tuig sa Sinulog Festival kauban sa iyang mapili nga festival gikan sa kalungsuran. “Ako g’yung gi-ampo ug ako naglaom nga mahuman kining atong giatubang karon nga matawag tang krisis gyud ug ako nag-ampo nga makakuha gyud ta og katarungan didto sa Court of Appeals,” matud pa ni Garcia.
Sa niaging tuig 2012, si Garcia nisayaw kauban sa La Torta Festival sa lungsod sa Argao. Gitakda unta siya karong mosayaw sa mananaug sa 2012 Pasigarbo sa Sugbo nga mao ang Rosquillos’ Festival sa lungsod sa Liloan kansang mayor, Vincent Franco “Duke” Frasco, iyang umagad.
Mipadayag hinuon og pagduda si Frasco nga dili sila hatagan og ayuda ilabi na nga si acting Gob. Agnes Magpale nahimong kaaway sa iyang ugangan nga gobernador.
“Let him come to us, tan-awon nato maka afford ba ta,” matud pang Magpale. Samtang parehong mipadayag og kaandam sila si Garcia ug Magpale sa paghatag og ayudang pinansiyal alang sa Sinulog Foundation nga maoy gihimo sa kagamhanan sa lalawigan sa Sugbo sa nangaging katuigan.
Hinuon matud pang Magpale nga mas gamay sa P3 milyones nga gihatag ni Garcia sa niaging tuig ang mahatag niya karon sa Sinulog Foundation gumikan sa sitwasyon sa probinsiya.
“Still willing to give. . .ayaw lang ko pasayawa,” sumala pang Magpale. (Gregg M. Rubio/EIM) (BANAT NEWS)
- Latest
