Langyaw nga tigpatanto nailad og P300 mil

CEBU, Philippines - Mokabat sa P300,000 kapin nga kantidad nga salapi ang nahanaw gikan sa usa ka Greek national nga negosyante nga nanag-iya og money changer ug pawnshop sa dalan A.  del Rosario sa barangay Guizo, dakbayan sa Mandaue  dihang nakadawat kini og prenda nga lain-laing mini nga alahas nga gipatuong pure nga  bulawan.

Ang biktima mao si Nicolaus Maidas, 50, minyo sa Pilipina niining asawa nga maoy tag-iya  sa Santorine Money Changer and Pawnshop nga nahimutang sa nahisgutang dapit. Si PO2 David Omambac sa kapolisan sa Presinto 1 sa Mandaue City Police Office (MCPO) miingon nga midangop kanila ang biktima nga nagdala sa kapin sa 35 ka mga resibo sa giprendang alahas nga naglakip sa singsing, kuwentas, bracelet ug uban pa.

Dugang pa niya nga nagkalain-lain ang pangalan sa nagprenda nga nahimutang sa mga resibo ug ang pipila niini adunay address apan dihang gisusi ang gibutang nga pangalan ug address sa tawo walay usa nga nakaila kanila.

Matud pa ni Omambac nga ang asawang Filipina sa langyaw wala nianang tungora tungod kay mipauli kini sa Bohol ug ang biktima ray nagbantay sa ilang negosyo. Si Omambac miingon nga kun dili kaayo hanas ang mo-appraise sa value sa maong alahas mailad gyud kini tungod kay maayo gyud pagkahimo sa maong mini nga mga alahas.( /EIM) (BANAT NEWS)