Duha ka tawo nalumos

CEBU, Philippines - Duha ka tawo ang napalgang patay sa managlahing mga dapit ug parehong gidudahang nangalumos.

Sa siyudad sa Mandaue, usa ka tiguwang nga lalaki nga gibanabanang 70-anyos pataas ang napalgang patay diha sa baybayon sa Zone Lower Sibuyas, barangay Paknaan alas-8 pasado ang takna sa miaging buntag.

Si PO2 Richard Ares sa kapolisan sa Presinto 3 sa Mandaue City Police Office (MCPO) nga nahinabi sa Banat News miingon nga gibanabana nga lima ka tiil ug unom ka pulgada ang pamarog, kasarangan ang gidak-on sa panglawas nga nagsul-ob og itom nga pantalon ug blue nga jacket ang maong tiguwang.

Napalgan kini sa usa ka mananagat nga si Gerry dela Cruz. Gidudahan sa kapolisan nga naanod lang kini gikan sa laing lugar.

Samtang  patay nang napalgan ilawom sa dagat ang drayber sa usa ka delivery truck human kini nalumos dihang naligo nga hubog kauban ang mga barkada sa baywalk sa Poblacion lungsod sa Bantayan sa isla sa Bantayan niadtong Martes sa alas 4:00 sa kaadlawon.

Dead on arrival  sa Bantayan District Hospital si Mardy Albacite, 22, molupyo sa Manan-aw barangay Bantigue Bantayan ug drayber sa usa ka delivery truck.

Matud ni PO2 Joram Desucatan sa Bantayan Police Station dihang nahinabi sa Banat News nag-inom  si Albacite uban sa duha ka barkada sa maong dapit ug nakadesider nga mangaligo sa dagat ug didto nangambak sa dagat. Unang nikawas ang mga kauban niini apan wala na mosunod pa si Albacite hinungdan nga gi-report dayun kini sa kapulisan. Ug sa pagpangita napalgan kini sa ilawom sa dagat ug wala na maglihok.( /EIM) (BANAT NEWS)