Magpale andam moatubang sa asong gisang-at sa Sugbo TV

CEBU, Philippines - Mipadayag sa iyang kaandam si Acting Gov. Agnes Magpale nga atubangon ang kasong gisang-at sa mga kawani sa Sugbo TV ug Sugbo News tungod sa pagpasira ug pagpaundang niya sa operasyon  niini niadtong Disyembre 21, 2012.

Sumala pa ni Magpale nga igo ra siyang nagtuman sa mando gikan sa DILG ug wala siya’y gikahadlokan.

Nasayran nga niadtong adlaw nga Martes ang mga kawani sa Sugbo TV pormal nga nipasaka og kasong grave abuse of authority, grave misconduct, oppression, conduct unbecoming of a public officials ug violation of Republic Act No. 3019 Sec 3 (a) and (e) ug grave coercion ngadto sa Ombudsman batok ni acting governor Agnes Magpale.

Lakip sa gikasuhan mao si PRO-7 regional director Marcelo Garbo Jr., Supt. Leopoldo Cabanag,  Atty. Czareem Joseph Estella ug ubang mga opisyal sa kapolisan gikan sa Regional Public Satety Battalion 7 tungod sa kalit ug pugsanong pagpasira sa Sugbo TV ug Sugbo News.

Sa iyang bahin, ang gisuspensong gobernador nga si  Gwendolyn Garcia miingon nga kung ang katuyoan lang ni Magpale mao ang pag-review sa operasyon sa maong estasyonan, wala na unta kinahanglana pang kini pahunongon og sibya.

Labot sa mass resignation sa mga kawani sa Sugbo TV ug Sugbo News, si Magpale nangangkon nga makaduha ka higayon nga gitigom niya ang mga kawani sa maong estasyonan ug gani 12 sa 35 ka mga empleyado niini ang mikompirmar kaniyang  magpabilin nga motrabaho.

Samtang nidagsa ang supporters ni Garcia sa pagbisita niini sa Kapitolyo human makadungog nga ang Court of Appeals wala pa mohatag og Temporary Restraining Order ngadto sa gobernador tungod kay gisupak kini sa solicitor general.

Nibisita sa gobernador ang mga opisyal sa Pilar Camotes, mga barangay officials ug barangay health workers sa lungsod sa Sibonga, Talisay ug Minglanilla.

Naghilak usab nga migakos ni Garcia ang kanhi Pasigarbo sa Sugbo Queen 2012 nga si Victoria Dagatan ug emotional nga nipadayag sa iyang simpatiya ug pagsuporta sa gobernador. (/EIM) (BANAT NEWS)