Way helmet 1 patay 1 angol

CEBU, Philippines - Usa ang patay samtang usa usab  ang  naangol sa  mga motoristang walay helmet  human madasmag sa railing daplin  sa karsada ang gisakyan nilang motorsiklo   didto  sa national highway  sa barangay  Poblacion, lungsod  sa Alcantara   kagahapon  sa kaadlawon.

Ang nakabsan  sa kinabuhi mao  si  Joseph Panerio, hingkod,  nga  taga- Barangay Veve,  samtang   ang naangol  mao usab  mao   si Michael Gelasque, 26, pulos  taga  Alcantara.

Ang  mga biktima  giingong   nagsakay sa pula nga motorsiklo nga walay plate number ug paingon na unta silang  mopauli gikan  nga  nanisko sa lungsod sa Moalboal dihang nasugamak  sa disgrasya.

Si PO3 Ludivico Odever, sa Alcantara Police Station, nagkanayon nga sa pag-abot sa mga biktima sa kurbadahong dalan duol sa St. Augustine Church, wala  na  makontrolar ni   Panerio  ang  manobela   sa ilang  sakyanan  hinungdan  nga imbis  mosubay  kini  sa karsada, tungod  sa kakusog  nga dagan mideretso na  kini  og dasmag sa puthaw  nga railing sa  daplin sa dalan.

Tungod sa kakusog sa pagkabanda sa sakyanan  ngadto  sa  koral nga puthaw   nangalagpot  ang mga biktima ug  nagdungan  kini  og tugpa  sa sementadong  karsada.

Gumikan  sa kusog  nga  pagkabundak  sa ulo  nga walay helemt, si Panerio namatay  diha-diha  samtang  si  Gelasque  nga  wala  kaayo  masubrahe  ang  pagkabundak  sa ulo, kasamtangang  gitam-balan  sa Badian District Hospital.

 Si Gelasque   dihang  gisukit  sa kapolisan  mitug-an  nga  nag-inom    sila sa dayon  na  nilang pamauli  gikan  sa diskohan. (WC)(BANAT NEWS)