Salubre pahulipan

CEBU, Philippines - Pahulipan ni Acting Governor Agnes Magpale si Provincial Treasurer  Roy Salubre  human mawagtang ang iyang pagsalig niini.

Suma pa ni Magpale nga may kasaypanan nga nahimo si Salubre sa  tinuod nga gidak-on sa gahin alang unta sa Christmas bonus alang sa tanang mga kawani sa Kapitolyo ug ingon man sa kalambigitan usab ni Salubre sa kaso sa Balili Property uban ni  suspendidong governor  Gwendolyn  Garcia.

Si Magpale mipahibawo nga iya nang gisulatan ang mga kadagkuan sa Bureau of Local Government Finance nga ilisan si Salubre sa labing daling panahon. Iya usab nga gipadad-an og sulat ang mga opisyal sa Commission on Audit (COA) sa kaulohan aron mopahigayon  og  special cash audit sa panudlanan sa kagamhanan sa lalawigan sa Sugbo.

Sa iyang bahin, si Salubre miangkon nga walay kasaypanan siyang nahimo dihang iyang gitug-an ngadto sa acting governor nga P51 milyones    lamang ang gahin alang sa bonus sa mga kawani sa Kapitolyo  apan nataligam-an  diay  niya  nga may igo pa diay nga gahin alang unta niini.

Hinuon iyang gipahibawo nga gisultihan na siyang daan sa buhatan ni Magpale nga pahulipan siya sa iyang katungdanan subay sa nahisgutang mga kakulian.

Si Salubre miingon nga wala siyay mahimo  sa desisyon  ni Magpale  kay alang kaniya igo ra siyang naghimo sa iyang trabaho isip provincial treasurer sa probinsiya sa Sugbo. Gipaabot nga temporaryong mopuli ni Salubre mao si Manny Gial ang kasamtangang provincial accountant sa probinsiya sa Sugbo.

Sa iyang bahin, si 3rd District Cong. Pablo John PJ Garcia mihulagway sa gihimo ni Magpale ngadto kang Salubre nga laing matang sa pagpanghadlok  sa mga department heads ug mga kawani sa Kapitolyo aron mokooperar nila ug motuman sa ilang mando.

Si  PJ Garcia niingon nga ang pagpalagpot ni Magpale kang Salubre lakip na ang giingong pagpang-renew sa mga casual ug contractual nga kawani sa Kapitolyo sulod sa usa ka bulan, usa ka kalapasan  sa Local Government Code  kay  walay gahum si Magpale isip acting governor sa pagpalagpot o pag-hire og mga kawani.

Si PJ Garcia niingon nga mahimong kapasakaan og kasong usurpation of public function si Magpale niining  iyang  gibuhat sanglit wala pa man makaabot og 30 working days sukad gipatuman sa Malacanang ang unom ka bulan nga suspension order   batok  sa gobernador.

Samtang si Deputy Speaker Pablo Garcia miklaro nga ang executive function lamang   sa suspendidong gobernador  maoy   nasuspenso ug walay labot ang katungod  niini sa pag-hire, pagsuspenso,   ug pagpalagpot sa mga kawani sa Kapitolyo. (WC)(BANAT NEWS)