Radaza ma-membro na sa MCIAA board

CEBU, Philippines - Gikalipay ni Lapulapu City Lone District Congressmen Arturo “Boy” Radaza ang paglig-on  sa Senado   nga  marepresentahan   sa kagamhanang lokal sa dakbayan sa Lapulapu   ang Mactan Cebu International Airport  Authority (MCIAA) Board.

Matud pa ni Cong. Radaza   nga sa milabay’ng Dec. 12, 2012 dungan sa pag-lig-on  sa RH Bill naaprobahan usab ang House Bill nga gipangamahanan ni Senador Ralph Recto nga magtugot   pagdestino  og local chief executive o mayor sa dakbayan sa Lapulapu ngadto sa MCIAA Board.

Sa maong resolution 17 ka senador ang mipabor  sa ikatulo ug  katapusan nga pagbasa  niini  didto sa hawanan sa senado.

Gumikan niini si Cong. Radaza nagkanayon  nga usa kini ka maayong gasa ngadto sa mga Oponganon sa pagsugat sa Bag-ong  Tuig   kay  ang maong kalambuan alang   man  sa kaayohan  sa dakbayan sa Lapulapu.

Samtang si Mayor Paz Radaza sa iyang bahin mihangop sa paningkamot ni Cong. Radaza sa maong issue gumikan kay importante kini nga adunay molingkod nga representante sa dakbayan sa Lapulapu ngadto sa MCIAA Board.

Ang tugpahanan anaa mahimutang sa dakbayan sa Lapulapu apan sukad sa pagsugod sa operasyon sa tugpahanan wala’y  representante  ang  kagamhanan  sa  Lapulapu  alang  sa hunta  sa mga  magbabalaod sa  MCIAA  gumikan  kay  nagpasulabi man ang politika sa mga milabay’ng administrasyon.

Hinoon matud pa ni Mayor Radaza kun makalingkod siya sa MCIAA Board iyang paninguhaon nga mamahimong mas molambo ang dakbayan sa Lapulapu sa natad sa turismo ug ekonomiya niini. - /WC (BANAT NEWS)