Illegal terminals sa mandaue gireklamo

CEBU, Philippines - Gihangop sa transport sector ang gipatumang experimental rerouting sa Traffic Enforcement Agency of Mandaue (TEAM) tungod kay dili lang kini gitumong alang sa pagpaluag sa naghuot nga kadalanan sa dakbayan kay napakgang usab niini  ang mga illegal terminal sa dakbayan.

Si Romeo Armamento nga maoy presidente sa  Mandaue United Driver’s Association nga mao usab ang tigpamaba sa  Northern Alliance of  PUJ Driver’s sa iyang pamahayag miingon nga ang mga illegal terminals anaa mahimutang sa Northern Artrium ug sa atubangan sa San Miguel Corporation sa dalan Highway Seno sa maong dakbayan.

Dugang pa niya  nga diha sa mga illegal nga terminals nagtagaktak nga P20 ang ilang mahatag ngadto sa mga dispatser.

Apan nunot sa rerouting nangawala ang ubang mga ilegal nga terminal apan hinay-hinay usab nga nagkakusog diha sa dalan A.S. Fortuna nga nahimutang duol sa  Norkis Building.

Nanawagan si Armamento kang Edwin Ermac, ang executive officer sa TEAM nga gukdon kining mga nagpasiugda og mga illegal terminals sa kadalanan.

Si Armamento nga nahinabi sa mga tigbalita sa gipahigayong press conference dili pa dugay mipadayag kini nga ilang namatikdan ang pagluag sa gidaghanon sa mga sakyanan sa dalan nga nagpaingon sa Metro Gaisano ug eskina Caltex ug San Miguel Corporation sukad sa pagpatuman sa rerouting sa kagamhanan sa maong dakbayan.

Gidasonan ang pamahayag ni Armamento sa laing sakop sa transport groups nga si Alexander Velasco nga maoy Cebu Coordinator sa Confederation of Transport Worker’s Cooperative  sa Sugbo. - /EIM (BANAT NEWS)