DENR migahin og P370M alang sa green program
CEBU, Philippines - Ang Department of Environment and Natural Resources (DENR-7) migahin og dul-an sa P370 milyones alang sa National Greening Program (NGP) sa tuig 2013.
Matud pa ni DENR-7 Regional Executive Director Dr. Isabelo Montejo nga kining maong kantidad maoy gastohon aron sa pagpalabong sa kakahoyan sa dul-an sa 24, 461 ka ektarya nga kalasangan dinhi sa rehiyon.
Ang maong gidak-on labaw og 230 porsento sa gidak-ong gitanoman og mga kahoy sa tuig 2012 nga mikabat lang og 10,623 ka ektarya.
Gitudlo sa Physical and Financial Plan (PFP) alang sa 2013 nga gipagawas sa Planning Management Division (PMD), ang probinsya sa Sugbo nga makakuha sa labing dako nga bahin nga mokabat sa P152.196 milyones o 41.15 porsyento nga molasang sa 9, 429 ka ektarya.
Ang Negros Oriental mabahinan og P136.103 milyones o 36.80 porsyento alang sa pagpananom og kahoy sa 9, 689 ka ektaryang luna niini, samtang ang Bohol makadawat og P76.199 milyones o 20.60 porsyento alang usab sa tamnanan og kahoy niini nga mokabat sa 5, 058 ka ektarya, ug P4.532 milyones usab ang madawat sa Siquior o 1.23 porsyento alang sa 185 ka ektaryang lasangonon niini.
Ang NGP anaa na sa ika -tulo nga tuig sa implementasyon niini agi og pagsunod sa Philippine Development Plan (PDP) sa administrasyong Aquino.
Gibutyag ni Montejo nga positibo kaayo sila nga makuha ang target nga gitakda sa Central Office tungod kay gigahinan man sila og tukmang budget.. - /WC (BANAT NEWS)
- Latest
