Illegal drugs mikunhod subay sa 2012 anti-illegal drugs operations sa CPPO

CEBU, Philippines - Mikunhod ang gidaghanon sa kaso sa illegal nga drugas sa lalawigan sa Sugbo sa tuig 2012 itandi sa tuig 2011 base sa accomplishment report sa Anti-Illegal Drugs Operations sa Cebu Provincial Police Office (CPPO).

Adunay 427 nga operasyon ang natala sa 2012 kumpara sa 2011 nga aduna lay 438 nga naglangkob sa buy-bust operations, saturation drives, raids, marijuana eradication, ug pag-aresto pinaagi sa warrant.

Ang pagkunhod sa gidaghanon gituohang bunga kini sa hugot nga kampanya kontra ilegal nga drugas sa CPPO.

Sa 2011, ang datos nagpakita nga adunay 520 ka mga tawo ang nasikop, 229 niini mga drug pushers, 265 ang  drug users, duha ka marijuana plantation cultivators, ug 24 ka tawo ang nasikop pinaagi sa warrant of arrest tungod gihapon sa kalambigitan sa illegal drugs.

Apan mas niubos ang nasikop sa tuig 2012 kay aduna lang kini 490 sa natala sa record sa CPPO ug 175 niini mga tigpayuhot ug drugas, 270 tigamitan ug drugas, usa ka marijuana plantation cultivator, ug 44 ang nasikop pinaagi sa oplan tracker operations.

Ang kaso nga napasaka batok sa mga nasikop miabot na og 405 sa 2012 itandi sa 397 sa 2011.

Ang kantidad usab sa drugas nga nakumpiska sa kapulisan nga P9,706,331 sa 2012 mas taas kini kumpara sa P6,226,403 sa 2011.

Nipagawas usab og lista ang CPPO sa nag-unang napulo ka police units nga aktibo sa pagpatuman sa kampanya batok sa illegal nga drugas.

Ang Consolacion Police Station milupig sa 43 ka mga lungsod ug unom ka component cities human kini makabuhat og 38 ka operasyon nga adunay 47 ka dinakpan, ug 36 ka kaso nga napasaka.

Kini gisundan sa Danao City Police Station nga adunay 37 ka operasyon kung diin 37 ka tao ang nasikop ug 32 ka kaso ang napasaka.

Ikatulo mao ang Provincial Intelligence Branch nga adunay 25 nga operasyon, 29 ka-arestado ug 25 nga kaso ang napasaka.

Kini gisundan sa Balamban Police Station adunay 24 ka operasyon, 19 ang nasikop ug 20 nga kaso ang napasaka; Toledo City Police Station adunay 24 ka operasyon, 28 ang nasikop ug 24 ka kaso ang napasaka; Dalaguete Police Station adunay 21 ka operasyon, 21 arestado, ug 19 ka kaso; Argao Police Station adunay 18 ka operasyon, 21 ang arestado ug 18 ang napasaka; Carcar City Police Station nga adunay 18 ka operasyon, 20 nasikop ug 18 ang napasaka; Talisay City Police Station nga adunay 16 ka operasyon, 19 ang nasikop ug 14 ang napasaka; Borbon Police Station adunay 14 ka operasyon, 13 ang nasikop ug 12 ang napasaka na.

Si Cebu Provincial Police Office director Patrocinio Comendador mibutyag nga ang datos nagpakita nga wala sila nagpabaya sa kampanya batok sa illegal nga drugas. Apan, dili gihapon kini igo aron sila muhunong na.

“Para nako ang nakuha nga drugs (P6.2 million) dili pa na enough, taas gihapon na kinahanglan pa gyud i-intensify ang operation,” matud ni Comendador.

Si Comendador mitug-an nga mihinay ang ilang operasyon sa mga buwan sa Oktobre, Nobyembre ug Disyembre tungod sa hiningusgan nga kampanya batok sa illegal nga sugal.

“Medyo nihinay among operasyon sa drugs anang mga buwana kay ni-focus mi sa illegal gambling which was upon directive of the higher headquarters,” butyag ni Comendador.

Si Comendador nanghinaut nga karong tuiga mas momenos pa gyud ang kaso nga naglambigit sa illegal nga druga kumpara sa milabayng tuig.  - /EIM (BANAT NEWS)