Piccolo maoy nag-unang hinungdan sa biktima sa pabuto karong tuig 2012

CEBU, Philippines - Nag-una gihapon ang piccolo nga matang sa pabuto sa daghan og nabiktima sa mga nagpabuto karong tuiga, sagad sa mga biktima mga bata.

Ang maong matang gihapon sa pabuto maoy nag-unang hinungdan sa mga nakadisgrasya og mga bata niadtong tuig 2011.

Base sa talaan sa Department of Health, miabot na og 186 ka mga biktima ang nabuthan sa tibuok nasud wala pay labot ang posibleng nangabuthan usab kagabii atol sa pagsugat sa Bag-ong Tuig.

Sumala pa ni National Epidemiology Center head, Dr. Enrique Tayag, ang mga nabiktima nabuthan og pabuto ug dunay usa nga naigo sa saag nga bala ug usa ang nahilo sa pabuto.

Sa maong gidaghanon, 107 niini pulos nabuthan og piccolo gikan sa 6-anyos ngadto sa 10-anyos. Nasuta usab nga 78 sa maong mga nabuthan pulos mga bata nga nag-edad og 10-anyos paubos, 57 niini migamit og piccolo.

Ang DOH mipasidaan nga kung tan-awon daw dili makasakit ang piccolo nga ikadlit lang sa asoge sa posporo tungod kay susama lang kini kadako sa stick sa lollipop nga mugbo. Apan sulod sa tulo ka tuig mao kini ang nag-unang hinungdan sa mga nabuthan.

Ang piccolo makapaso, ginagmay nga samad o makabuskag sa tudlo ug ang labing kuyaw, makabuta kini tungod sa pinisik niini kung duol sa nawong sa tawo. Niadtong tuig 2011, 265 sa 972 nga nabuthan resulta sa piccolo. Sa 2010 miabot usab og 295 ang nabuthan sa piccolo.

Kaniadto pa gi-ban ang maong pabuto apan wala gyud kini mawala sa mga baligyaanan og pabuto, ug tungod kay tag P10 ra ang karton niini dali ra kining mapalit sa mga bata.  (BANAT NEWS)