Gipang-demolis sa Tejero mireklamong way kabalhinan

CEBU, Philippines -  Gibutyag sa konsehal sa Barangay  Tejero niining dakbayan sa Sugbo nga si Garry Lao nga wala’y pasiunang pagpahibalo ngadto sa mga opisyales sa barangay ang pagpangguba sa kabalayan sa ilang barangay.

Ang clearing operation gihimo sa Prevention Restoration Order Beautification and Enhancement (Probe) ngadto sa pipila ka  mga balay sa Tejero.

Matud pa ni Lao nga sa miaging adlaw pa unta gub-on  ang unom sa 39  ka mga balay demolisonon apan wala madayon human siya mireklamo nga wala’y klarong relocation site nga kabalhinan ang mga tawo.

Una na nga mipadayag ang kagamhanan nga duna matud pa’y relocation site ang maapektohan sa clearing operation nga nahimutang ra usab sa Tejero.

Apan gitataw ni Lao nga wala siya’y nakita nga saktong relocation site sanglit aduna ma’y nakagamit daan sa nahisgutang luna nga maoy gitagana sa siyudad alang sa maapektohan sa clearing.

Hangyo ni Lao ngadto sa siyudad nga kinahanglan nga mahatagan dayon kini og solusyon sanglit naproblema pag-ayo ang iyang mga konstituwente.

Gisuwayan og tawag sa Banat News ang hepe sa Probe nga si Raquel Arce  apan dili kini makontak.

Kahinumdoman nga niadtong Disyembre 24 pa gitagalan ang nahisgutang mga residente kabahin sa himoong drainage project sa siyudad sa maong dapit.

       Matud pa nga  gawas sa relocation site, aduna pud sila’y madawat nga P10,000 nga cash assistance. (EIM)  (BANAT NEWS)