Misuway og punit sa gidagkotang hotdog nabuthan sa mata, napisok

CEBU, Philippines -  Napisok ang walang bahin sa mata sa usa ka 14- anyos nga batan-ong lalaki nga anak sa usa ka magtutudlo human kini mabuthi sa giduwaang pabuto nga hotdog sa gawas nga bahin sa ilang pinuy-anan sa barangay Campo -7  sa lungsod sa Minglanilla.

Kini nahitabo niadto pang petsa 24 ning bulana sa udto atol nga naghinangat ang pagsugat sa Pasko apan kagahapong adlawa lang kini gipa-blotter diha sa kapulisan tungod kay ang mga tagtungod  miuna og atiman sa biktima nga gidala sa pribadong tambalanan dinhi sa dakbayan sa Sugbo. Ang biktima mao si John Klesel Gabiana,14, molupyo sa maong lugar.

Matud ni PO1 Bella Palatan sa Minglanilla Police Station dihang nahinabi sa Banat News subay sa inisyal nga imbistigasyon gikatahong giduwaan sa biktima  ang pabuto nga hotdog niadtong tungura gawas sa ilang pinuy-anan.

Gikatahong gisulod sa biktima ang maong pabuto sa usa ka lata ug pagkahuman gidat-ogan og bato una pa gidagkotan ang pabilo dayon midagan kini palayo.

Apan paglabay sa pipila ka minutos wala  gyud  kini mobuto hinungdan nga giduol kini sa biktima ug dihang padulong na niya kining puniton kalit kining nibuto ug naigo sa splinters ang walang bahin sa mata niini.

Daling gidala sa Chung Hua hospital dinhi sa dakbayan sa Sugbo si Gabiana tungod sa kadaghan sa dugo gikan sa mata niini ug karon luwas na ang kahimtang apan wala ibutyag ang tinud-anay nga sitwasyon sa mata niini.

Ang kapolisan, kabomberuhan ug ang Department of  Health sayo pa lang daan ning bulana nagpunay na og pahimangno sa publiko nga likayan ang paggamit og pabuto ilabi na sa mga bata. (EIM) (BANAT NEWS)