RA 10354(RH LAW) Pro-Life groups ug Simbahan mo-petisyon sa Korte Suprema

CEBU, Philippines -  Mipadayag sa kabalaka  ang kaparian sa Simbahang Katoliko nga mas mosamot pa ang imoralidad human hingpit nang napirmahan ni Presidente Benigno Aquino III ang kontrobersyal nga Reproductive Health Bill.

Si Monsignor Esteban Binghay sa pakighinabi sa Banat News nabalaka ang simbahan nga dili lang mga minyo ang makakuha dayon og mga contraceptives.

Ang maong RH Bill nga gitawag og Republic Act 10354 o Responsible Parenthood and Reproductive Health Act of  2012 adunay mga probisyon sa maong balaod alang sa “safe sex.”

Gikabalak-ang mosamot pa unya ang pre-marital sex nga posibleng mosangko pa unya ngadto sa sayong pagkamabdos ug abortion. Gibutyag ni Binghay nga sa sunod tuig ang Catholic Bishops Conference of the Philippines (CBCP) moduso og petisyon batok sa maong bill. Gihulagway ni Binghay nga ang pagkahimong balaod sa bill karon usa ka dakung hagit sa kaparian ug simbahan.

Ang simbahan mopadayon sa ilang pagtudlo ngadto sa katawhan kabahin sa moralidad ug natural nga family planning.

Matud usab ni Binghay nga ang pagpasar sa bill usa ka discriminatory sa katolikong simbahan ug mga katolikong tunghaan sanglit nalakip sa mga probisyon niini nagmando sa mga tunghaan nga itudlo ang sex education. Samtang gipahibalo  sa chapter head sa Human Life International- Cebu nga si Dr. Rene Bullecer nga wala na’y mahitabong pag-martsa sa kadalanan kalabot sa pakigbatok nila sa kontrobersyal nga Reproductive Health Bill.

Ang pagpirma wala dayon mabalita apan ning bag-ohay lang nanggawas ang mga report nga niadto pang Disyembre 21 diay kini napirmahi, apan wala gihapon kompirmaha sa Malacañang.

Matud pa ni Bullecer nga segurado na ang plano sa iyang grupo sa mga kadagkoan sa simbahan sa pagpasaka og petisyon batok sa maong balaod ngadto sa Korte Suprema sunod semana.

“Wala ko mag-expect nga pirmahan dayon na sa presidente, akong pagtoo kay sa sunod buwan pa niya pirmahan,” matud pa ni Bullecer. Samtang tigpamaba sa Akbayan-Cebu nga si Mikay Dumabok misaysay dinhi sa Banat News nga dako kaayong gasa ang maong kalamboan. Matud pa ni Dumabok nga alang ra man pud sa kaayohan sa katawhan ang maong balaod ug usa kini sa mga pamaagi nga maminosan ang problema sa kalisod. (EIM) (BANAT NEWS)