Nanguha og ICC stickers nagdasok sa DTI

CEBU, Philippines - Kung dili moabot ang deadline, dili mabiyaan sa mga Filipino ang ilang mga “importanteng” gimbuhaton sama sa trabaho, lakaw ug uban pa.

Kagahapon nagdasok ang buhatan sa Department of Trade and Industry-7 tungod sa katapusang adlaw sa pagpang-inspeksyon sa mga standard safety helmet alang sa mga nanag-iya og motorsiklo.

Gikan sa gawas hangtud sa sulod sa opisina nagdasok ang mga tawo sa mga linya, gani ang uban kanila naabtan na lang sa tingpaniudto ug ang uban nahapunan sa linya nga daw wala moirog gumikan sa kataas.

Kini gumikan sa pahibalong karong Enero 2 sugdan na ang higpit nga implementasyon sa Standard Protective Helmet Act nga diin gidili na ang sub-standard nga mga crash helmets sa kadalanan. Tumong niini nga mahatagan pa og tsansang mabuhi ang mga mag-motorsiklo nga masugamak og aksidente tungod sa proteksyong ilang gisul-ob sa ulo. Nasuta sa pagtuon nga dako kaayo ang purohang mamatay ang usa ka motoristang dili magsuot og standard safety helmet gumikan sa head injuries.

Ang Land Transportation Office kon LTO-7 maoy moimplimentar sa maong balaod. Matud pa ni LTO-7 director Raul Aguilus nakadawat na sila og direktiba kabahin niini nga nag-obligar sa tanang mga nanag-iya og motorsiklo nga kinahanglang nakapasar sa standard sa DTI ang ilang gigamit nga helmet.

Ipatuman unta ang maong bag-ong balaod niadtong milabay’ng bulan sa Agosto apan gioktaba aron mahatagan og panahon ang mga motorista nga makakuha og ICC sticker gikan sa DTI hinungdan nga gisibog sa petsa dos sunod  buwan. (BANAT NEWS)