CEBU, Philippines - Patay na nga nadiskobrehan ang usa ka Korean national nga nagbuy-od sa ubos sa katre sa balay nga gipuy-an niini sa barangay Babag, dakbayan sa Lapulapu niadtong bisperas sa Pasko.
Ang biktima giila sa kapolisan nga si James Chung, 46, ulitawo nga lumad nga taga South Korea ug temporaryong nag-abang sa balay ni Analisa Emanates sa Block 5, Lot 8 sa Aldea Buena, Subdivision sa Babag.
Si PO2 John Carlo Jocotan sa homicide section sa kapolisan sa maong dakbayan nga nahinabi sa Banat News miingon nga nadiskobrihan ang patay’ng lawas sa maong Koreano dihang mibisita ang higala niini nga si Charito Abellar.
Matud pa ni PO2 Jocotan nga sirado ang pultahan sa balay nga gipuy-an sa maong Koreano ug wala usay mitubag sa iyang pagtawag sa cell phone niini.
Maoy hinungdan nga iyang giguba ang sira sa pultahan sa lawak sa biktima ug nakurat na lang siya dihang nakita niya nga nagbuy-od na kini sa sawog nga wala nay kinabuhi.
Dugang pa ni PO2 Jocotan nga gisuwayan pa kini og hatod ni Abellar ngadto sa Lapulapu City District Hospital apan gideklarar kini nga patay na sa pag-abot.
Si PO2 Jocotan miingon nga bag-o pang nakagawas sa hospital ang biktima gumikan sa balatian niini ug gituohan nila nga nabughat kini hinungdan sa iyang kamatayon apan ila pa kining ipaubos sa autopsy sa pagsiguro nga wala kini binuangi og patay. (BANAT NEWS)