Soco motabang sa mga drayber sa traysikol

CEBU, Philippines - Gipasaligan ni  businessman Glenn Soco  ang  mga  drayber  sa   traysikol  sa dakbayan  sa  Mandaue  nga  iyang hatagan  og  ayuda aron molambo  ang  panginabuhi  sa maong sector.

Ang maong  pasalig gihimo ni Soco  sa iyang  pakig-atubang  sa  miaging  adlaw  sa mga  sakop  sa  Mandaue Tricycle Drivers Association (MTDA).

Matud  pa  ni  Soco  nga  ang   panginabuhi  sa   mga driver  sa traysikol  usa  ka dungganon  busa  dili  angay  isipon  nga ubos  ang  maong  matang  panginabuhi.

Gipasabot  ni Soco  nga  ang serbisyo  sa mga traysikol  dako kaayo  og  ikatabang  sa inadlaw-adlaw  nga  kalihokan  sa  mga  molupyo  sa  Mandaue  tungod  kay  sila  ang  kaabag  sa  pagpakabuhi  sa  mga  molupyo.

  Alang  kang Soco  nga  ang  traysikol  mao  ray sakyanan  nga makasum-ok  sa gagmay  nga  mga karsada  nga suoton  kaayo  busa  napahimuslan  kini  sa mga  mangomprahay  sa merkado  ug  uban  pang  palakaw  sa kinabuhi  ug panginabuhi.

Wala  pa hinuon  mobungat  si Soco  sa tabang  nga  iyang  ihatag  sa  mga drayber  sa traysikol  sa Mandaue,  siya miingon  nga  kun  unsay  iyang  gipamulong  iya  gayud  kining  tumanon.

Tungod  sa kalipay  sa maong  mga  drayber  sa traysikol, nagkahiusa  sila  sa pagsuporta  kang  Soco  alang  sa  umaabot  nga piniliay sa 2013. Si  Soco  kandidato  sa pagka-Vice Governor  sa election  sa  2013  ug  gituohan  nga  dili  siya  maulahi  sa  iyang  mga  kaatbang  sa maong  posisyon.  (BANAT NEWS)