Dalagita nadasmagan patay

CEBU, Philippines -  Namatay  diha -diha ang   usa  ka 16 anyos nga dalagita human kini dasmagi og sakyanan sa iyang paglabang sa karsada didto sa national highway sa barangay Colon siyudad sa Naga niadtong Biyernes sa alas 10:30 sa gabii.

Ang biktima mao si Angel Montebon, 16, dalagita ug nagpuyo ra sa maong lugar.

Samtang ang nakadasmag kaniya mao ang usa ka Toyota Hi-Lux kolor itom ug “for registration” pa  ang plaka niini nga gimaneho ni Cerenia Bacus, 51, minyo ug taga  barangay Linao, siyudad sa Talisay.

Si PO2 Ronjie Nadora sa Naga City Police Station dihang nahinabi sa Banat News  subay sa   pasiunang   imbistigasiyon   nga ang sakyanan nagdagan  gikan sa Naga  ug paingon unta sa siyudad sa Talisay.

Apan pag-abot sa maong lugar ang biktima kalit   lang milabang sa karsada sa walay pupanagana   hinungdan nga  pag-abot sa tunga- tunga nga bahin sa karsada nadasmagan kini sa sakyanan.

Ang  drayber  naglisud  na  sa pag-apply  og  preno  tungod  sa  kaapiki  na ug  kaduol  na  sa biktima.

Nalabay sa biktima ug sa  pagkapantok  sa  ulo niini sa semento nga karsada nasumagak  sa hinanaling  kamatayon Gidala  kini  sa  mga nakasaksi  ngadto  sa   Minglanilla District hospital apan gideklarar  kini  nga Dead On Arrival (DOA).

Samtang ang drayber sa Toyota Hi-lux  mitahan  dayon  ngadto  sa kapolisan   ug  kasamtangan  kining gibalhug sa detention cell sa dakbayan sa Talisay tungod kay walay detention cell alang sa mga babaye nga piniriso  ang dakbayan  sa Naga.

Ugma  pa   ipasaka ang tukmang sumbong batok sa maong draybre. (WC) (BANAT NEWS)