Polis misukmag sa mabdos

CEBU, Philippines -  Usa ka pulis ang gisikop sa Investigation and Detective Management Branch human kini giingong mikulata sa live-in partner niini kagahapon sa kaadlawon sa sulod sa karaang Fuente Police Station sa siyudad sa Sugbo.

Si PO2 Carlo Balasoto, nga nadestino sa Fuente Police Station giingong mikulata sa 26-anyos ug duha ka buwan nga mabdos niyang live-in partner.

Ang babaye mipasangil ni Balasoto nga misukmag sa iyang tiyan ug mituok kaniya human kini giingong nasuko samtang sila naglalis sa may Fuente Osmeña mga ala 1:00 sa kaadlawon.

Si Balasoto nagsul-ob pa sa uniporme niini ug on-duty adtong higayona. Matud ni Chief Insp. Alexis Relado, hepe sa IDMB, nga dihang nasuko si Balasoto kalit niining giguyod ang biktima paingon sa abandonadong police station ug didto gisukmag niini makaduha ka higayon sa tiyan sa mabdos una pa kini gituok.

Human sa hitabo giingong gidala ni Balasoto ang biktima sa Barangay Punta Princesa ug didto niya kini gibiyaan, ang biktima bisan sa gidangatan mipugos og sumbong ngadto sa IDMB.

Si Relado daling mipatawag kang Insp. Isagani Pugoy, deputy chief sa Fuente Police Station kinsa maoy midala kang Balasoto ngadto sa opisina niini.

Gidisarmahan ni Relado sa iyang .9mm pistol si Balasoto  ingon man ang mga bala niini tungod sa reklamo sa  kapuyo ug pagkahuman gitanggong sa karsel sa Cebu City Police Office stockade.

Si Relado mitug-an nga aduna silay nadawat nga report nga tigamitan og ginadiling drugas si Balasoto.

“Naa mi nadawat nga tigamitan siya pero dili lang una mi mo-confirm kay wala pa’y resulta sa drug test,” matud pang Relado.  (BANAT NEWS)