Tawo misilaob

CEBU, Philippines -  Mokabat sa P1.2 milyong danyos ang gibilin sa dakong sunog nga miugdaw sa lima ka mga panimalay sa Tres de Abril Street sa Barangay Punta Princesa ning dakbayan kagahapon sa hapon, diin usa ka engineer nga residente ang nagrabehan human mosilaob ang iyang lawas tungod sa kalayo.

Matud pa ni Fire Officer 3 Andrew Omar Segovia sa Cebu City Fire Department ang danyos miabot sa 1.2 million, base  sa pasiunang imbestigasyon nagsugod ang sunog sa kusina sa balay ni Mary Grace Abella.

Ang igsuon ni Abella nga si Junjun Beltran, 59, padulong untang mokuha og pagkaon sa kusina dihang nakit-an niining nasunog na ang kusina. Tungod niini dali niyang gitawag ang bayaw nga si Engr. Edgardo Abella, 57, city engineer sa siyudad,  ug nagpakitabang sa pag-ingon nga “sunog-sunog”.

Si Beltran miingon nga ilang gisuwayan sa pagpawong ang kalayo apan napakyas ang ilang tinguha.

Daling miresponde ang Cebu City Fire Department uban sa Emergency Rescue Unit Foundation (ERUF) ug Filipino-Chinese Brigade ug napawong kini sulod sa 28-minutos.

Si Edgardo,  daling gidala sa tambalanan gumikan sa 3rd degree burns . Sumala pa nga misulod sa ilang balay si Edgardo aron pukawon ang iyang asawa, ug mga anak ug ilang katabang.

“Pagnaog na niya naabtan lang gyud siya sa kalayo. Paggawas niya sa pultahan pila ka steps niya natumba na siya kay gakayo naman siya hasta iyang buhok gakayo na,” matud pang Beltran.

Sumala pang Mary Cienne Abella, anak ni Edgardo gidala ang iyang amahan sa Cebu City Medical Center ug gibalhin na sa Chong Hua Hospital.

Ang pagbanabang P1.2 milyon nga danyos matud pang Beltran gamay ra sa tinud-anay nga danyos.

 “Naa pa gyud nang Vios ug Kia nga sakyanan ug duha ka motor plus ang mga appliances pa,” pasabot pa ni Beltran.

Wala pa matino kung unsay sinugdanan sa maong sunog. Nasuta usab nga lakip sa nabiktima sa maong sunog mao ang sport editor nga si Emmanuel Villaruel sa igsuong pamantalaan sa Banat News nga The Freeman kinsa nag-abang usab sa maong compound. (/EIM) (BANAT NEWS)