14 ka tuig nagtago sa iyang kasong pagpangawat nasigpatan, nadakpan
CEBU, Philippines - Human sa katorse ka tuig sa pagtagotago, notadong tulisan sa siyudad sa Sugbo nasikop sa Theft and Robbery Section (TRS) niadtong miaging adlaw sa udto diha sa Sanciangko St., Barangay Kamagayan ning dakbayan.
Ang suspek giilang si Huglay “Kabayo” Lim, 42, taga-Barangay Mambaling, giingong responsable sa mga kawat ug pagpanulis sa dakbayan giingong nakit-an ni SPO2 Marlon Mendoza sa TRS pipila ka semana ang nakalabay sa Barangay Kamagayan. Gumikan niini daling mipahigayon og verification ang kapulisan sa dapit ug dihang nakompirmar gisikop kini pinasikad sa arrest warrant sa kasong robbery nga giisyu ni Judge Ramon Codilla Jr., Regional Trial Court Branch 19, Cebu City.
Si Lim anaa na karon sa Cebu City Police Office. Usa si Lim sa gipasanginlan nga responsable sa robbery sa opisina sa Sun Star Publishing sa Fuente Osmeña Rotunda 14 ka tuig na ang milabay apan ang kapulisan dili na makahatag pa og detalye tungod sa kadugay na sa hitabo.
Si Lim giingong miyembro sa Aznar robbery group kaniadto. Matud ni PO1 Ramil Duyag, sa TRS, nga milarga sa Manila si Lim human sa maong krimen apan mibalik kini sa siyudad adtong Septiyembre sa pagtuo nga wala na iyang kaso.
“Sa Manila siya nagtago-tago unya nibalik siya kay nagtuo nga wala na to iyang kaso pero wala siya mag-expect gani nga madakpan,” Duyag said.
Sa laing bahin, gi-deny ni Lim nga usa siya ka tulisan ug miyembro sa mga kawat.
Apan siya mitug-an nga nagtrabaho siya sa Manila isip delivery man sa usa ka kompanya. Wala pud si bisan kinsa nga nakasugilon kaniya mahitungod sa iyang kaso.
“Dili na ako, gani pagkahitabo ako lang ilang giduot wa gani ko kahibalo ana,” matud niya. (EIM) (BANAT NEWS)
- Latest
