Anak ni Greg Sanchez miapelar kang Gwen

CEBU, Philippines -  Niapilar ang anak ni anhing bise gob. Gregorio Sanchez Jr., ngadto sa gisuspensong si Gob. Gwendolyn Garcia nga unta malinawon na lang kining mokanaog sa katungdanan.

Kini gumikan sa nagkagrabeng tensyon diha sa Kapitolyo ug nakaapekto na sa serbisyo alang sa publiko.

Matud ni Engr. Gigi Sanchez Zaballero lehitimong proseso ang pagpagawas sa unom ka bulan nga suspension order batok kang Garcia nga gipasaka kaniadtong 2010 panahon pa sa iyang amahan nga si anhing bise gobernador Sanchez.

Dugang ni Engr. Sanchez-Zaballero nga human sa kamatayon sa iyang amahan sila maoy mipadayon sa kaso ug nangita sa dugang mga ebidensiya aron molutaw ang hustisya sa pagpanaugdaog kaniadto sa executive department pinangulohan ni Garcia ngadto sa buhatan sa bise gobernador.

Gisalikway ni Zaballero ang pasangil sa kampo sa mga Garcia nga giatol ang pagpagawas sa desisyon sa nagsingabot nga Pasko aron mo-insakto nga unom ka bulan sa eleksyon sa Mayo sa sunod tuig aron dili na makabalik sa Kapitolyo ang suspendidong gobernador.

Matud ni Zaballero dili magpili og adlaw ug bulan ang hustisya kun kini ihatag ug ikapatuman na batok niadtong malapason sa balaod.

Samtang si Liberal Party gubernatorial candidate Hilario “Junjun” Davide III nitataw nga wala nay lalison pa ug bugtong si acting Governor Agnes Magpale ra gyud ang lehitimong gobernador sa Sugbo pagkakarun.

Nanawagan  si Davide sa mga tawo ilabina kadtong nagpalakaw og sayop nga estorya nga hunongon na kini ug dili libugon ang hunahuna sa publiko. (/EIM)  (BANAT NEWS)