Nursing student nagpusil sa ulo patay

CEBU, Philippines - Patay nang nakit-an ang 21-anyos nga nursing student nga dunay samad pinusilan sa ulo ug naglunang sa kaugalingong dugo sulod sa pinuy-anan niini sa Barangay Sabang siyudad sa Danao niadtong Miyerkules sa alas 6:45 sa hapon.

Ang nagpakamatay mao si Nina Carriza Monterola Almacin,19, usa ka  nursing student sa usa ka iladong unibersidad dinhi sa Sugbo ug nagpuyo ra sa maong lugar. Matud ni SPO4 Edgar Gomez sa Danao City Police Station dihang nahinabi sa Banat News nga nakugang siya pag-abot sa ilaha gikan mitambong sa usa ka novena nga wala nay kinabuhi iyang anak. Subay sa nakuhang impormasyon sa mga imbestigador gikan sa inahan sa namatay nga si Ma. Theresa Almacin  diha sa kwarto sa namatay kini napalgan.

Usa ka samad pinusilan sa tuong bahin sa ulo ang nakaingon sa kamatayon niini. Ang kapulisan naka-recover og kalibre .45 nga pistol diha sa crime scene ug dunay magazine ug usa ka deformed slug ug duha ka cellphone.

Gituohan nga dunay personal nga problema ang maong estudyante maong nagpusil kini sa kaugalingon ug ang gikahibulongan kun diin gikan ang maong armas. (BANAT NEWS)