CEBU, Philippines - Napaksit ang agtang ug walang bahin sa aping sa usa ka 44 anyos nga ulitawo human kini tigbasa samtang natulog sulod sa iyang balay sa Sitio Gakit, barangay Kabitu-onan siyudad sa Toledo sa miaging kaadlawon.
Ang biktima mao si Sergio Espinosa, 44, ulitawo og nagpuyo sa maong lugar.
Si SPO4 Gil Lastimosa, desk officer sa Toledo City Police Station mibutyag sa Banat News nga natulog nga nag-inusara ang biktima sulod sa iyang balay nga wala manirado sa pultahan.
Gumikan sa pagkahinanok niini sa pagkatulog wala kini makamatikod sa kriminal nga misaka sa iyang balay ug dayon gitigbas ang iyang nawong sa duha ka higayon, dayon ang iyang aping ug ang agtang.
Wala makabantay ang mga silingan tungod kay ngitngit kaayo ang palibot busa nakaikyas ang kriminal nga wala hiilhi.
Ang kapolisan padayon pa karon sa ilang imbistigasyon ug sentro sa gikonsiderar nga motibo mao ang personal grudge. Gisusi usab sa kapolisan ang background sa biktima, samtang padayong gipangita ang kriminal. (BANAT NEWS)