Agro Fair sa Capitol gibuksan

CEBU, Philippines - Hapsay  ug  gihugopan  sa daghang tawo ang  gibuksan  nga Pasko sa Kapitolyo Agro Fair 2012 niatong  Lunes.

Gipahimutang kini  sa likod  nga bahin sa   Capitol building diin ang nagkadaiyang produkto gikan sa mga utanon; prutas; lagutmon; mga nagkalainlaing pagkaon ug uban pang mga produkto sa kaumahan gikan sa kalungsoran ang giladlad  sa maong  luna alang sa publiko.

Ang maong agro fair  naandan  na nga kalihukan matag tuig ubos sa administrasyon ni Governor Gwendolyn Garcia.

Samtang si Dr. Mary Rose Vincoy, ang hepe sa Cebu Provincial Veterinarian’s Office ug Co-Chairperson sa Pasko sa Kapitolyo Agro Fair nagkanayon nga kining maong kalihokan usa ka kahigayonan sa  mga mag-uuma  kinsa  makaladlad  sa ilang  mga produkto nga libre sulod  sa usa ka semana sa likod  nga  bahin  sa Kapitolyo.

Sa samang  higayon  mapahimuslan  usab  sa katawhan  ang  mga  lab-as  kaayong  mga produkto  sa kaumahan  nga  mohatag og  sustansya  sa  ilang lawas.

Gawas sa mga prutas ug lagutmon, may food court usab alang  niadtong gusto mokaon.

Si Dr. Vincoy mipasalig usab nga luwas kaayo ang tanan nga mosulod sa agro fair sa Kapitolyo kay may  mga  security guard  nga  nagbantay niini  sulod  sa   24 oras matag  adlaw. (WC) (BANAT NEWS)