Double dead nga karne sa Talisay gibantayan

CEBU, Philippines - Higpit nga gibantayan sa Meat Task Force (MTF)ang  mga merkado  sa dakbayan  sa Talisay  aron pagsiguro nga wala’y ipalusot nga double dead nga  karne  sa  pagsaulog sa Pasko ug Bag-ong Tuig.

Si Talisay City Veterinarian, Dr. Santiago Hortel nga nahinabi sa Banat News kagahapon mibutyag nga matag adlaw adunay sakop sa MTF ang mobantay  sa merkado publiko sa Lagtang.

Ilang susihon   ang tanang mga baligyang karne kun sulod ra ba sa dakbayan  sa Talisay  kini  maihaw.

Ang  mga  karne  nga  wala’y marka gikan sa ihawan sa Talisay, diha-diha  imbargohon kini sa task force tungod kay posibleng ang maong karne double dead ug dili limpiyo   nga peligrong  makadaot sa lawas sa konsumedor.

Gawas sa merkado sa Lagtang may  mga sakop usab sa task force nga   gitahasang  mobantay  sa mga satellite market sa barangay Dumlog, Pooc ug San Roque.

Ang tulo ka mga supermarket sa siyudad  sa Lawaan I, Tabunok ug sa sitio Laray, San Roque habig sa Cebu South Coastal Road gi-monitor usab  sa MTF.

Ang  lima ka  meat vendor  sa  merkado sa Lagtang nga  namaligya  og imported  meat   gipanid-an   usab  sa mga sakop  sa MTF  kun  ang  mga  karne  niini  gisulod  ba  sa freezer.

Kini  tungod    sa kadako  sa  peligro  kun  ang  maong  mga  karne  nga  may  gidugayon  na gikan sa gawas  ug  dili ikasulod og freezer  nga  dali ra kaayong  mataptan  og  kagaw  nga  makadaot  sa panglawas  sa tawo  nga makakaon  niini.

Sa laing bahin, gibutyag sa city veterinarian nga sa buwan sa Oktubre   ug  Nobiyembre niining tuiga mikabat  og  P1.2 milyones ang kita sa ihawan   sa Talisay ug gilauman nilang mosaka pa kini niining buwana hangtud sa sunod tuig. (WC) (BANAT NEWS)