16 ka Citom positibo sa drugs

CEBU, Philippines -  Moabot ngadto sa16 ka mga empleyado sa City Traffic Operations Management (CITOM) ang nagpositibo nga migamit og ginadiling drugas sa gihimong surpresa nga drug test sa maong departamento sa  Cebu City Hall kagahapong adlawa.

Ang  Cebu City Office for Substance Abuse Prevention (COSAP) maoy nangulo sa operasyon sa  90 ka mga empleyado sa CITOM.

Sumala pa ni CITOM Executive Director Rafael Christopher Yap nga 91 ka mga sakop sa CITOM ang gipaubos sa drug test apan ang usa misibat pinaagi sa pag-ambak gikan sa ikatulong andana ngadto sa ikaduhang andana sa CITOM building.

Sumala pa ni  Yap nga iyaha gyud nga ipaimbestigar ang maong kawani sa CITOM nga miikyas gumikan kay tataw nga kadudahan ang gilihok niini.

“I will make a recommendation to investigate him because of the presumption of guilt,” matud pa ni Yap.

Ang gipahigayon nga random drug screening gidungan usab sa flu vaccination alang sa mga sakop sa CITOM.

Dalhon una sa kaulohan ang resulta sa maong eksaminasyon alang sa himoon nga confirmatory test.

Nagkanayon si Yap nga posibleng dili na ma-renew ang ilang kontrata alang sa casual nga mga empleyado nga mapamatud-an nga nigamit og ginadiling drugas.

Dugang pa niya nga importante kaayo nga limpyo gikan sa ilegal nga drugas ang mga kawani sa gobyerno sanglit sila maoy nag-alagad sa katawhan.

Nasayran nga nagpadayon gihapon ang pagpahigayon sa COSAP sa surpresang drug test sa nagkadaiyang barangay sa dakbayan sa Sugbo.  (BANAT NEWS)