Natagak sa pangpang

CEBU, Philippines -  Patay nang nakit-an ang 65-anyos nga dalagang-guwang human kini gituohang nadakin-as ug natagak sa pangpang samtang nangumpay og pagkaon sa iyang mga binuhing kanding sa bukirang bahin sa barangay Butong sa lungsod sa Argao niadtong Huwebes sa alas 6:0 o sa hapon.

Ang biktima mao si Adelisa Rabanyo, 65, nagpuyo sa maong lugar.

Matud ni PO2 Marvin Chensa sa Argao Police Station dihang nahinabi sa Banat News subay sa inisyal sa imbestigasyon sa igsuon sa namatay nga si Esperanza Rabanyo Llego nga katapusan nilang nakit-an ang biktima alas 2:00 sa nakalabay’ng hapon nga nananghid kining mangumpay sa iyang mga buhing kanding.

Apan wala na mopauli ang biktima hinungdan nga nabalaka ang mga kabanay ug  gipangita nila kini ug didto nila makit-i sa ubos nga bahin sa pangpang ug napasok pa gyud sa lungag.

Ang tiguwang nakaangkon og  samad sa agtang ug kalawasan nga gituohang nakuha niya gikan sa pagkatagak gikan sa ibabaw nga bahin sa pangpang.

Gidudahan nga nadakin-as ang biktima ug natagak kini sa pangpang.

Ang kapulisan nirekomendar nga ipaubos ug autopsy ang patay’ng lawas aron matino kun wala bay foul play ang maong panghitabu. (/EIM) (BANAT NEWS)