Vendors sa Tabunok nagbarikada

CEBU, Philippines - Mga vendors diha sa Nacario Trade Center (NTC) sa barangay Tabunok, dakbayan sa Talisay ang nagbarikada kagahapon sa hapon tungod kay gidid-an na silang  makapaninda sa mga sakop sa anti-sidewalk vendors task force ug licensing office sa city hall. Tuyo sa siyudad nga sirad-an ang unom ka mga stalls diha sa maong lugar.

Si Inspector Rio Hugo Ipong kinsa maoy nangulo sa kapolisan nga mihatag og siguridad sa lugar pagmentenar sa kahapsay ug kalinaw mibutyag sa Banat News kagahapon nga dunay gamay’ng komosyon nga nahitabo kagahapon tali sa task force ug mga vendors.

Gawas sa barikadang gibutang dunay mga bugoy usab diha sa lugar ang giingong nagdala og mga botelya, kahoy ug mga bato apan pag-abot sa mga polis nanagan apan ilang giablihan ang barikada.

Kahinumduman nga sa milabay’ng mga buwan nahitabo ang kagubot dihang ang mga tinda sa mga vendors diha sa Molave likod sa NTC gikarga sa task force ngadto sa ilang truck ug gani dunay mga sakop sa task force ang napusilan ug napusposan.

Si Talisay City Administrator Richel Bacaltos nga nahinabi sa Banat News mibutyag nga ang tag-iya sa maong mga stall nakalapas sa kamanduan sa korte tungod kay namaligya kini og bugas.

Ang mga vendor diha sa NTC dili patindahon og bugas, buwad, isda, karne ug mga poultry products ug nahibaw-an usab nga wala kini business permit gikan sa siyudad.

Ang mga vendors sa maong establisamento mipasangil nga maong wala sila’y permit tungod kay dili sila hatagan sa siyudad. (/EIM) (BANAT NEWS)