7 ka opisyal sa polis taktakon

CEBU, Philippines - Pito ka  intelligence officer  ang  gitakdang  mataktak sa ilang  katungdanan  ug  hulipan  sa puwesto  pinaagi  sa mando  sa  hepe sa kapolisan sa Central Visayas gumikan  sa ilang  kapakyas  sa pagsumpo sa illegal nga sugal sa ilang dapit.

Ang  maong  mga intillegence officer   kasamtangang  nadestino  sa  Cebu City Police Office, Cebu Provincial Police Office, Lapulapu City Police Office, Mandaue Police Office, Negros Police, Bohol ug Siquijor. Gipugngan  una  ni  PRO-7 Regional Director Marcelo Garbo Jr.   ang  pagbutyag  sa  mga ngalan  sa maong  mga  opisyal  apan  iyang  gisuta  nga  ang maong  mga  opisyal  hinay  kaayo  og  lihok sa  pagsumpo sa illegal nga sugal  sa ilang  tagsatagsa nga  hurisdiksyon.

Hinuon si Regional Intelligence Division Chief Supt. Paul Labra mibutyag  nga nakadawat siya og mando gikan kang Garbo nga  ipaubos  pa sa evaluation ang nahisgutang mga intelligence officer.

Dugang pa ni Labra nga ang  resulta  sa ilang ipahigayong evaluation ug investigation sa maong  mga  opisyal   ilang iduso   sa buhatan ni Garbo aron  masayran  kun  si kinsa gayud ang mataktak  sa ilang posisyon. Samtang si Sr. Supt.  Melvin  Buenafe, ang hepe sa kapolisan sa dakbayan sa Sugbo nagkanayon nga anugonan  siya  kun  mawagtang ang ilang inteligence officer apan wala  siyay   mahimo tungod kay mando  kini  sa ilang  labaw.

Susama usab niini ang  gipahayag  ni  CPPO  Director Sr. Supt. Patrocinio Comendador. (BANAT NEWS)