CEBU, Philippines - Mga high-powered firearms ang nasakmit sa kapolisan sa dakbayan sa Sugbo gikan sa usa ka sundalo nga nagbase sa artillery unit sa Panay pasado alas- 8 sa miaging gabii diha sa pantalan sa Pier 2 ning dakbayan.
Ang nasikop mao si Corporal Richard Francilizo, 37, sakop sa Artillery Unit sa Panay Island kinsa padulong unta sa Dapitan sa Mindanao.
Ang mga kapolisan sa Waterfront Police Station pinanguluhan ni Chief Insp. Wildemar Tiu nakadawat og tawag gikan sa usa ka gwardiya sa maong pier ug mipahibalo kalabot sa usa ka armadong lalaki nga nagdala og daghang armas.
Tungod niini, daling miadto ang kapolisan sa pier 2 inubanan sa mga sakop sa Special Weapons and Tactics (SWAT) ug gidakop ang maong sundalo nga nagdala sa unom ka mga calibre .45 pistola uban sa unom ka magazines niini ug usa ka .357 rebolber. Ang hepe sa kapolisan sa dakbayan sa Sugbo, Sr. Supt. Melvin Buenafe nagdudang gamiton ang maong mga armas sa umaabot nga eleksyon.
Dako usab ang pagduda ni Buenafe nga posibleng gamiton sa dautan ang mga armas nga ilang nasakmit ilabi na nga nagsingabot na ang eleksyon.
Samtang ang bag-ong station commander sa Waterfront Police Station mipadayag usab nga base sa ilang nakuha nga impormasyon ang maong mga armas naggikan ra dinhi sa Sugbo.
Gisuwayan pagkuha ang habig sa dinakpan apan nagdumili kini sa pagkomento kalabot sa maong pasangil batok kaniya.
Giandam na sa kapolisan ang kasong kalapasan sa Republic Act 8294 kon illegal possession of firearms batok sa maong sundalo. (BANAT NEWS)