Supply sa manok ug itlog di kabalak-an

CEBU, Philippines - Mipasidaan  ang buhatan sa Provincial Veterinarian's Office (PVO) sa  publiko  nga  dili angay  mabalaka  nga  magnihit  ang suplay  sa manok  ug itlog  niining  panahona  tungod  kay  abunda  ang  Sugbo niining  matanga  sa pagkaon.

Ang  maong  pasidaan  gihimo  ni Dr. Mary Rose Vincoy, hepe sa PVO  nunot  sa  mga kasinatian  nga  matag  pasko  ug  bag-ong  tuig naandan na nga  kusog  kaayo  ang  palit  niining  mga  butanga.

Apan  matud pa ni Vincoy nga adunay  abundang  supply  sa    manok ingon man  itlog alang   sa  panginahanglan sa  katawhan  niining bulan sa Disyembre.

Kining  suplaya  matud  pa niya  maggikan sa isla  sa  Bantayan  diin  tua  didto  ang  naglawod-lawod  nga  mga poultry sa  manok.

Gawas niini, si Vincoy nagkanayon usab nga gawas sa Bantayan, aduna pay  daghan  nga kakuhaan og supply sa manok ug itlog gikan sa ubang bahin sa lalawigan sa Sugbo. Kini tungod kay ubay-ubay na man ang mga magpapatigayon nga misagop niining matang  sa negosyo nga  poultry sa manok dinhi sa lalawigan sa Sugbo. (BANAT NEWS)