Gipatay sa kulata

CEBU, Philippines - Patay ang usa ka lalaki nga giingong nagpasalba og pusil human gitabangan og kulata sa mga estambay sa sitio Gemilina, Poblacion sa lungsod sa Barili niadtong Domingo sa alas 8:30 sa gabii.

Ang biktima nga patay nang nadangat sa tambalanan mao si Nicomedes Orcullo, dunay kapuyo ug molupyo sa barangay Mantayupan, Barili nga nakuhaan og .357 nga rebolber.

Matud ni PO3 Heinie Aspera sa Barili Police dihang nahinabi sa Banat News naningil sa utang nga usa ka libo ka pesos kang Pablito Guzman, 37, nga nagpuyo sa maong lugar ang biktima.

Gikatahong nasuko si Orcullo dihang gibalibaran kini og bayad ug gisaarang unya pa sa petsa 13 sa Enero sunod tuig siya mabayran ni Guzman, ug dihadiha gikatahong mibunot og armas ang biktima ug nanghasi ug mipabuto niini.

Ang maong panghitabo nakapaalarma sa mga estambay sa maong lugar ug diretsong miatake sa biktima ug gitabangan nila kini og kulata.

Sumala pa nga bisan natumba na si Orcullo gitabangan pa gyud kini og yatakyatak sa mga tawo ug mihunong ra ang mga tawo sa ilang gibuhat sa paglabay sa lugar ni PO2 John Sacan nga nadestino sa Moalboal Police gikan mi-duty.

Gikatahong gi-turnover ngadto ni PO2 Sacan sa mga tawo ang giingong usa ka .357 rebolber nga may lima ka buhing bala ug usa ka basiyo sulod sa tambor niini nga gikan kang Orcullo.

Ang biktima daling gipadala ngadto sa Barili District Hospital apan pag-abot didto patay na kini.

Ang patay’ng lawas sa biktima gipaubos pa sa autopsy sa paghimo ning balita samtang padayon pa ang imbestigasyon pag-ila sa mga tawo mitabang og kulata sa biktima aron sila pasakaan og kaso. (/EIM)(BANAT NEWS)