Substandard nga Christmas light sa Talisay gibantayan

CEBU, Philippines - Ang mga  tindahan sa dakbayan sa Talisay nga namaligya og mga Christmas light gisusi sa kabomberohan sa siyudad pagsuta kung dili ba substandard ang ilang mga baligyang dayan-dayan sa pasko.

Si Chief Inspector Antonio Ortiz, Fire Marshal sa siyudad nagkanayon  nga sa pagtuman sa kamanduan sa nasudnon nga  ang  ilang  gibuhat  maoy pagtuman sa mando sa  buhatan sa Bureau of Fire Protection (BFP)  kalabot  sa kamahinungdanon  nga  masusi  ang mga baligya  nga  Christmas  light.

Kini  tungod  kay  kasagaran  sa maong  mga  dekorasyon o dayan-dayan  sa pasko  maoy  mahimong  tinubdan  sa  mga  dagkong  sunog.

Ang maong operasyon sa kabomberohan sa siyudad nagsugod  sa milabay’ng semana.

Matud ni Ortiz nga ilang nasuta nga adunay mga ICC sticker ang mga baligyang dayan-dayan sa pasko  sa maong dakbayan.

Ang ICC o Import Commodity Certification ipapilit lamang  kini sa  mga baligya nga  nakapasar sa quality standard.

Ang hepe sa BFP sa Talisay nagkanayon nga sa tibuok buwan sa Disyembre  magbalik-balik sila og inspection sa mga tindahan  aron pagsiguro nga walay magpalusot og baligya nga mga substandard nga Christmas light.

Sa laing bahin, sama sa milabay’ng mga tuig ang mga maninda og pabuto adto  ra  pabaligyaa  niini  sa  barangay Lagtang duol sa gym sa maong  lugar.

Kadtong  mga vendor  nga mamaligya  niini   sa mga sidewalk sa Talisay sikopon  ug imbargohon ang  maong  mga  baligya.

Gikinahanglan  usab nga  ang maong  mga vendor  mokuha og permiso  gikan sa Firearms Explosive Security and Guards Supervision (FESAGS).

Gawas niini mokuha usab sila og permit gikan sa kagamhanan sa dakbayan sa Talisay  una  sila tugoti  nga  makalay-ag  niini didto  sa  Lagtang.

Ang maong  mga vendor  sa pabuto hatagan  og panahon sa  pagpamaligya  niini gikan sa Disyembre 16, 2012 hangtud sa Disyembre 31, 2012.

Gibalaod  usab  segun  sa permiso  nga  ihatag  sa kagamhanan  ngadto  sa  mga vendor og pabuto nga  ang ilang mga stall o tindahan  kinahanglang  modistansya og unom ka metros gikan  sa kasikbit  nilang  tindahan  ug  matag stall kinahanglan bitayan og  numero uban  sa  ngalan sa tag-iya niini.

Ang mga vendor dili tugotang magpahigayon og testing sa ilang mga baligyang pabuto ug kinahanglan nga aduna silay andam nga tubig sa palibot sa ilang tindahan.

Ang mga stock sa pabuto  sa display area hatagan  og  limiti  sa gidaghanon  nga  kutob  ra  sa 25 kilos.

Kinahanglang  ang  matag stall  ginama sa gahi ug lagpad   nga kahoy ang bungbong  ug ang atop kinahanglang sin. (BANAT NEWS)