Geohazard map ipasil-ing sa LGU

CEBU, Philippines - Gumikan  sa bagyong miigo  sa nasud  sa  miaging  semana , ang Mines and Geosciences Bureau-Region 7 (MGB-7) mimando sa mga lokal nga opisyales sa pagbisita pag-usab sa geohazard maps aron masuta kung asang dapita ang humok ra kaayong manahili ang  yuta ingon  man  dali  nga bahaan  aron makapadala dayon sila og pahimangno ngadto sa mga residente sa matag barangay.

Si MGB-7 Regional Director Loreto Alburo mihimo ning  maong  awhag agi og pagsunod sa pahimangno gikan sa Philippine Atmospheric, Geophysical and Astronomical Services Administration (PAGASA) kinsa  maoy unang  mipadangat  sa mga  pahibawo sa katawhan  bahin  sa  mga bagyo  nga  moigo  dinhi sa Kabisay-an sama  sa bagyong Ondoy ug   Ruping bag-ohay pa lang gayud nga miigo sa Sugbo ug uban pang mga dapit sa Central Visayas ug Mindanao.

Dugang pa ni Alburo nga ang mga  dapit  nga humok nga maigo sa baha mao kadtong  mga  lugar  nga duol  sa sapa , huyang  ang  mga material, haduol sa baybayon ug uban pa.   Gipadayag ni Alburo nga ang pagbaha mahitabo kun ang gilawmon sa tubig mosaka  hangtod nga  moawas ang  subra  nga tubig  gikan  sa mituhop  nga  kayutaan sa palibot ra usab sa maong dapit.

Samtang giawhag ni Alburo ang mga local chief executive nga magbaton gayud og geohazard maps ug moimplementar sa gikinahanglang panukdanan aron sa pagminus sa epekto sa pagdahili sa yuta ug pagbaha sulod sa ilang  tagsatagsa ka hurisdiksyon.

Dugang pa ni Alburo nga ang mga dapit nga dali ra kaayong maigo sa panahili sa yuta ug usab sa baha kinahanglang higpit  nga dumalahon sa mga local chief executives.

Sa syudad sa Sugbo, may 19 ka  barangay ang nasuta   nga dali ra kaayong maigo sa pagdahili sa yuta ug kini gilangkoban sa Barangay  Lusaran, Binaliw, Guba, Budlaan, Malubog, Buot-Taup, Busay, Sirao, Taptap, Tagbao, Tabunan, Pung-ol Sibugay,Sudlon II, Sudlon I, Sinsin, Buhisan, Pamutan, Sapangdaku, ug Adlaon.

Ang Barangay Tagjaguimit, Alpaco, Balirong, Mayana, Naalad, ug usab Barangay Cogon sa syudad sa  Naga giingong dali ra usab kaayo maigo sa pagdahili sa yuta.  Ang 11 ka mga barangay sa Balamban nga gilangkuban sa  Hingatmonan, Lamesa, Luca, Ginatilan, Cabasiangan, Matun-og, Cansomoroy, Gaas, Magsaysay, Cabagdalan, ug Duangan ug ang lima ka mga barangay sa syudad sa Toledo nga gilangkuban sa Tungkay, Pangamihan, Bagacay, Loay ug Don Andres Soriano ug usab Lamac sa Pinamungahan nahilakip usab sa lista nga landslide prone  nga  mga  lugar.

Samtang ang lima ka  barangay sa  Asturias nga naglangkob sa Agbanga, Baye, Bairan, Kanluangan, ug Sak-sak; ug ang 12 ka barangay sa Catmon nga naglangkob sa Amancion, Anapog, Bactas, Bongyas, Ambangkaya, Cabungaan, Can-ibuang, Duyan, Ginabucan, Panalipan, Tabili, ug lakip na ang tanang bukirang barangay sa syudad sa Talisay nga gilangkuban sa Brgy. Doldol, Purok 3 sa Dumanjug ug  Cansalonoy sa Ronda dali ra usab maapektohan sa pagdahili sa yuta.

Gibutyag ni Alburo nga base sa ilang assessment, adunay lima ka mga barangay sa syudad sa Sugbo nga giisip  nga  labing  kuyaw  nga maigo sa mga pagbaha ug kini gilangkuban sa  Kasambagan, Kinasang-an, Labangon, Mabolo, ug Bonbon. 

Samtang sa syudad sa Mandaue adunay pito ka mga barangay nga flood prone nga gilangkoban  sa Subangdaku, Mantuyong, Umapad, Opao, Alang-alang, Guizo, ug Pakna-an.

Sa susamang kalambuan, gipahibalo ni Alburo ang tanang operating mines ug quarries sa rehiyon 7 sa paghimo  gilayon  og  mga pangandam alang  sa bisan  unsang  natural nga kalamidad  nga  moabot  sa ilang tagsa-tagsa  ka  palibot. (BANAT NEWS)