Mag-uuma gipusil angol sud sa payag

CEBU, Philippines - Talandugon ang kahimtang sa usa ka mag-uuma human kini pusila sa  wala  hiilhing kriminal sulod  sa iyang  payag sa barangay Lindogon sa lungsod sa Sibonga, niadtong Sabado sa gabii.

Ang biktima mao si Narciso Cajismundo, 53,  ulitawo,  nga nagpuyo  sa maong  lugar.

Si SPO1 Oscar Cantay sa Sibonga Police Station mibutyag  sa  Banat News   nga nag-inusara  ang  biktima  sulod  sa iyang  payag  nga buot  na  untang  matulog dihang milanog ang buto-buto sa armas  de fuego  tulo ka higayon.

Gumikan  kay  miikyas  dayon  ang  kriminal, wala  na  kini  hiilhi  sa biktima  ug  sa  mga  silingan  gumikan sa kangitngit  sa   palibot.

Ang  mga silingan  nga nakabati  sa maong  buto-buto  sa armas misil-ing  sa payag  sa biktima ug maoy  ilang  nakita nga nagkadugo  na  kini  kay   samdan  ang tiyan ug walang bagtak.

Gisakwat  kini  sa mga  silingan  ug  gihatod  sa  tambalanan  sa lungsod  apan  gibalhin  dayon  kini  ngadto  sa Vicente Sotto Memorial Medical Center   sa dakbayan  sa Sugbo.

Padayon  pang gisuta  sa  kapolisan ang  background  sa biktima  ug  ang  motibo  sa pagpusil  niini. (Darrel A. Carumba/WC)

Gipusil angol sa kainom niyang kontra

Ni Romeo T. Limpangog

Naangol ang  usa ka  lalaki  human  kini  pusila sa gikainom niyang sakop  sa kontra  niyang  grupo  didto sa sitio Suba-Masulog, barangay  Basak, dakbayan  sa Lapulapu  sa miaging  kaadlawon.

Ang biktima  mao  si Jerson Languita, ulitawo  nga nagpuyo  sa maong  dapit, samtang  ang suspetsado  nailhan  lang  sa ngalang  Junrey kinsa  walay  klarong  address  ug  sakop  sa Out Law Gang.

Si PO2 John Carlo Jocotan  sa  homicide  section  sa kapolisan  sa maong  dakbayan  mibutyag  sa Banat  News  nga  ang  biktima  ug  ang suspetsado  kuyog  sa ilang  mga barkada  nagkaabot  sa usa  ka tindahan  sa ilang  lugar.

Apan  pipila  ka  gutlo  sa ilang  panag-inom  miabot  ang  laing  grupo  nga  kauban  sa suspetsado ug usa  niini  mitudlo  sa biktima  nga  sakop  sa Crips Gang  nga  kontra  sa ilang Out Law  Gang.

Dihang  nasayran  sa suspetsado  nga sakop  diay  sa kontra  nilang grupo  ang  biktima  diha-diha  milanit  kini  sa iyang armas  de fuego  ug  giluthang  ang  biktima.

Nasabak sa mga bala  ang nagkalainlaing  bahin  sa lawas  sa biktima  hinungdan  nga  gikan  sa tambalanan  sa Lapulapu  gideretso  kini  ngadto sa Vicente  Sotto Memorial Medical Center  sa dakbayan  sa Sugbo.  (Romeo T. Limpangog/WC) (BANAT BALITA)